"Nissan" rəqibi "Mitsubishi"-ni alır

"Nissan" yanacaq sərfiyyatı qalmaqalı ilə boğuşan Mitsubishi Motors-un 34%-ni 2.2 milyard dollara satın almaq üçün razılaşıb. Avtosfer.az "Marja"ya istinadən xəbər verir ki, "Nissan Motors" bu razılaşma ilə həm rəqibini iflasdan xilas edir, həm də şirkətin faktiki nəzarətini ələ alır. Son iyirmi il ərzində üçüncü dəfə qalmaqal ilə qarşı-qarşıya qalan Mitsubishi-nin satın alınması Çin xaricində Asiya bazarlarına girməkdə çətinlik çəkən Nissan-ın işinə yaraya bilər. Mitsubishi-nin avtomobilləri Tailand və Filippin kimi bazarlarda çox populyardır. "Mitsubishi" yanacaq səfiyyatın səhvini qəbul edib ictimaiyyətindən üzr istəmişdi. "Mitsubishi" ötən ay Yaponiya bazarı üçün istehsal etdiyi ən azı dörd avtomobilinin yanacaq sərfiyyatı göstəricisini əsassız şəkildə olduğundan daha aşağı göstərdiyini qəbul etmişdi. Bununla, şirkətin bazar dəyəri 3 milyard dollar aşağı düşüb və bazar payı itirən markanın da nüfuzu zərbə alıb. Verilən məlumata görə, iki şirkət Mitsubishi-nin "inamı bərpa etməsi" üçün səy göstərəcək. "Mitsubishi Motors" "Nissan" üçün 2.18 milyard dollar dəyərində yeni səhm çıxaracaq. Beləliklə, Yaponiya qanunlarına görə, "Nissan" "Mitsubishi" kapitalında nəzarət hüququ verən üçdə bir paya sahib olacaq.

"Mitsubishi"-də 34 faiz payı olan "Nissan"ın 43.4%-nin sahibi isə Fransanın avtomobil istehsalçısı "Renault"-a məxsusdur. Üç markanın satışları cəmi nəzərə alındıqda illik 9.3 milyon ədəd ilə "Toyota" və "Volkswagen"-dən sonra üçüncü yeri tutacaq.