Putinin maşını satışa çıxarıldı – VİDEO-FOTO

2012-ci ildə məxsusi olaraq Rusiya prezidenti Vladimir Putin üçün hazırlanan limuzin satışa çıxarılıb. Maşını almaq istəyən 1,2 milyon dollar ödəməli olacaq. Avtomobilin satılması barədə müvafiq elan nadir kolleksiya avtomobillərinin satışı ilə məşğul olan saytda dərc olunub. Putinin istifadə etdiyi "ZİL- 4112R" limuzinin yürüşü 143 kilometrdir. Maşın elektrik şüşəqaldırıcı, bar, soyuducu, monitor və iqlimə nəzarət sistemi ilə təchiz olunub. Avtomobilin mühərriki injektorla çalışır, təkərləri 18 düym təşkil edir. 3,5 ton çəkiyə malik maşın gülləkeçirməzdir.

Qeyd edək ki, 2012-ci ilin dekabr ayında "İzvestiya" qəzeti Rusiya prezidenti Vladimir Putinin ilk şəxslər üçün nəzərdə tutulan "ZİL- 4112R" limuzini yararsız hesab edib. Nəşrin məlumatına görə, dövlət başçısı maşını yoxladıqdan sonra orada bir sıra nöqsanlar tapıb. Lakin sonradan Kremlin mətbuat xidməti bu məlumatı təkzib edib.

Dövlətin ilk şəxslər üçün avtomobillər "Kortej" layihəsi çərçivəsində hazırlanır. Rusiyanın "AMO ZİL" zavodu ilk şəxslər üçün nəzərdə tutulmuş limuzinlərlə yanaşı sedan tipli avtomobillər də istehsal edir. 

Yaxın zamanlarda Vladimir Putin üçün nəzərdə tutulan yeni limuzinin hazırlanması yekunlaşır. Rusların dünyanın ən etibarlı limuzini adlandırdığı avtomobil 800 at gücündə mühərriklə 6 ton çəkiyə malik olacaq. Limuzinin xarici görünüşü isə “Rolls Royce”a bənzəyəcək. Layihə üçün ilkin olaraq 50 milyon rubl (990 000 manat) maliyə müəyyən edilib. 2018-ci ildə istehsal ediləcək limuzinin ilk buraxılışı Rusiya prezidenti Vladimir Putin üçün sifariş edilib. 

anspress