ABŞ-də 1955-ci ilin "Chevrolet"ni elektromobilə çevirdilər - FOTO

ABŞ-nin tanınmış tüninq atelyesi "West Coast Customs" 1955-ci il istehsalı olan "Chevrolet Bel Air"i müasir "Tesla Model 3" əsasında elektromobilə çevirib.

Avtosfer.az bu barədə motor.ru-ya istinadən xəbər verir.

Yenilənmiş "Bel Air"in kuzovu qırmızı rəngə boyanıb və parlaq qara detallarla tamamlanıb. Avtomobilə xüsusi hazırlanmış 20 düymlük təkər diskləri və LED işıqlandırma sistemi quraşdırılıb. Salonda hər iki markanın detalları xüsusi dizayn elementləri ilə birləşdirilib. Yeni üzlüklə örtülmüş oturacaqlardakı altıbucaqlı tikiş naxışı "Lamborghini"nin dizaynını xatırladır.

Avtomobilin batareyasını "Tesla Supercharger" stansiyalarında doldurmaq mümkündür. "Bel Air" avtomatik parklanma funksiyası da daxil olmaqla sürücüyə yardım sistemləri ilə təchiz edilib.

Qeyd edək ki, "Chevrolet Bel Air" 1949-cu ildən 1975-ci ilədək istehsal olunub.