İndiyə kimi Avropa ölkələrində ən çox elektrikli avtomobil hansı ölkədə satılıb? - STATİSTİKA

Avropada elektrikli avtomobil bazarında satışlar ildən-ilə yüksəlməyə davam edir. 

Avtosfer.az xəbər verir ki, “EBS Consulting”in “ACEA” məlumatlarına əsaslanan yeni hesabatına görə, 2025-ci ilin avqust ayında qitə üzrə on minlərlə elektrikli avtomobil satılıb.

Statistikaya əsasən, siyahıya 336 707 satışla Almaniya liderlik edir. İkinci yerdə 276 635 ədəd satışla Böyük Britaniya, üçüncü yerdə isə 184 871 satışla Fransa qərarlaşıb. Ümumilikdə isə 2025-ci ilin yanvar-avqust aylarında Avropanın müxtəlif ölkələrində elektrikli avtomobil satışları yüksək artım tempi göstərib.

Bu artımın əsas səbəbləri sırasında dövlətlərin tətbiq etdiyi stimullaşdırıcı tədbirlər, yeni model çeşidlərinin bazara çıxarılması və enerji doldurma məntəqələrinin genişlənməsi göstərilir.

2025-ci ilin ümumi satış rəqəmlərinə görə ilk onluq belə formalaşıb:

Almaniya – 336 707

Böyük Britaniya – 276 635

Fransa – 184 871

Türkiyə – 119 640

Belçika – 96 255

Norveç – 93 522

Niderland – 81 797

Danimarka – 75 456

İsveç – 62 611

İspaniya – 61 959

Azərbaycanda isə elektrikli avtomobil bazarı hələlik ilkin inkişaf mərhələsindədir. Satış rəqəmləri Avropa ilə müqayisədə aşağı olsa da, son illərdə marağın artdığı müşahidə olunur. Bunun səbəbi kimi ölkədə elektrik doldurma məntəqələrinin mərhələli şəkildə qurulması, həmçinin vətəndaşların bu seqmentə marağının yüksəlməsi göstərilir. Mütəxəssislər bildirirlər ki, yaxın illərdə Azərbaycanda da elektrikli avtomobillərin payı nəzərəçarpacaq dərəcədə arta bilər.

Eltac Zülfüqaroğlu