Sabirabadda yol polisi reyd keçirib - FOTO

Baş Dövlət Yol Polisinin (BDYP) Sabirabad  yol polisi bölməsinin 12-ci taqımı növbəti dəfə sərxoş, yükdaşıma və kobud qayda  pozan sürücülərə qarşı reyd keçirib.

Avtosfer.az-ın APA-ya istinadən məlumatına görə, reyd zamanı hərəkətin intensiv olduğu Hacıqabul-Bəhrəmtəpə magistralında təhlükəsizlik kəmərindən istifadə etməyən, sürücülük vəsiqəsi olmayan və digər qayda pozan sürücülər haqqında protokol yazılaraq inzibati məsuliyyətə cəlb ediliblər.

Reydlə bağlı Sabirabad  yol polisi bölməsindən bildirilib ki, reydin əsas məqsədi həm də nəqliyyat vasitələrinin sürücüləri ilə profilaktiki söhbətlər aparmaq olub. Sərnişindaşıma fəaliyyəti ilə məşğul olan nəqliyyat vasitələrinin sürücülərinə izah olunub ki, sərnişindaşıma ilə məşğul olarkən qaydalara əməl edilməli, normadan artıq sərnişin götürməməli, hərəkətdə olarkən dayanacaq olmayan yerlərdə avtobusu saxlamamalıdırlar. Havanın isti olmasını nəzərə alaraq sürücülərə və sərnişinlərə yola çıxmamaları barədə tövsiyələr edilib. Həmçinin yükdaşımalar zamanı normadan artıq yüklərin daşınması qəza vəziyyəti yaratmaqla bərabər oxa düşən yükün normadan artıq olması yolların sıradan çıxmasına da səbəb olması barədə yük avtomobillərinin sürücülərinə izah olunub. Bir neçə sürücü  barəsində inzibati protokollar tərtib edilib, sürücülük vəsiqəsi olmadan idarə olunan avtomobillər duracağa yerləşdirilib. Reyd zamanı polis əməkdaşları tərəfindən bəzi sürücü və sərnişinlərə postlarda olan imkanlar daxilində yardımlar edilib.