"Kontakt Home"un fırıldağının üstü açıldı - Ödənişlər geri qaytarılacaq - FOTO

Bir neçə gün əvvəl sosial şəbəkədə müştərilərdən biri "Kontakt Home" mağazasından övladı üçün aldığı "Huawei" planşetinin qələmi ilə bağlı şikayət paylaşmışdı. O bildirmişdi ki, qələmi ayrıca satın aldıqdan sonra qablaşdırmasının üzərində "Not for Sale" ("Satış üçün deyil") yazısı olduğunu görüb. Müştəri bununla bağlı "Huawei"yə müraciət etdiyini, daha sonra isə məsələni ictimailəşdirdiyini qeyd edib.

Avtosfer.az xəbər verir ki, paylaşımdan sonra "Kontakt Home" müştərinin müraciətinə cavab verərək məsələni araşdıracağını və onunla əlaqə saxlayacağını bildirmişdi.

Müştərinin son paylaşımına görə, daha sonra həm "Kontakt Home" həm də "Huawei"nin Azərbaycandakı nümayəndəliyi onunla əlaqə saxlayıb. Bildirilib ki, sözügedən qələm satış üçün nəzərdə tutulmayıb, lakin səhvən satışa çıxarılıb.

Şirkət nümayəndələri qələmin ödənişinin müştəriyə geri qaytarılacağını bildiriblər. Eyni zamanda qeyd olunub ki, planşetlə birlikdə həmin qələmi alan digər alıcılar da qəbzlə mağazaya müraciət edərək ödədikləri məbləği geri ala bilərlər.

Fərid