“Toyota” bu modelin istehsalına yenidən başlayır: Fərqli mühərriklərlə - FOTO

“Toyota” şirkəti Çində satışlarının 23 faiz azalmasından sonra yeni nəsil “Corolla” modelinin istehsalına 2028-ci ildən başlamağı planlaşdırır. Yeni modelin elektrik, hibrid və benzin mühərrikli versiyalarda təqdim edilməsi nəzərdə tutulur.

Avtosfer.az xəbər verir ki, yeni nəsil “Corolla”nın istehsalını “Toyota” ilə Çinin FAW Group şirkətinin birgə müəssisəsi olan FAW Toyota Motor həyata keçirəcək.

Modelin elektrik, hibrid və benzin mühərriklərini dəstəkləyən yeni avtomobil platforması əsasında hazırlanması planlaşdırılır.

Yeni nəsil “Corolla”nın konsept versiyası ötən ilin payızında keçirilən Yaponiya Mobillik Sərgisində təqdim olunub. Həmin vaxt “Toyota”nın prezidenti Koji Sato müxtəlif ölkələrdə yol şəraitinin və enerji imkanlarının fərqləndiyini vurğulayaraq, modelin müxtəlif mühərrik seçimləri ilə təklif edilməsinin planlaşdırıldığını bildirib.

Şirkət rəhbəri tam elektrikli versiya ilə yanaşı, hibrid və benzin mühərrikli variantların da istehsal olunacağını açıqlayıb.

Çin avtomobil bazarında elektrikli və digər yeni enerji mənbələri ilə işləyən nəqliyyat vasitələrinə tələbatın zəifləməsi, eləcə də istehsalçılar arasında rəqabətin güclənməsi şirkətlərin fəaliyyətinə təsir göstərir. Qiymət endirimləri də avtomobil istehsalçılarının gəlirliliyinə təzyiq yaradır.

“Toyota”nın Çindəki istehsal planları yalnız “Corolla” ilə məhdudlaşmır. Şirkətin 2027-ci ildən etibarən “Lexus” markası üçün daha uzun yürüş məsafəsinə malik yeni nəsil elektrikli avtomobillər istehsal etməsi də planlaşdırılır.

Eltac Zülfüqaroğlu