Bu küçədə aləm bir-birinə dəyir: Nişan quraşdırmaq yaddan çıxıb - VİDEO

Şəki restoranının yanında aparılan təmir-tikinti işləri ilə bağlı paytaxtın Əhməd Rəcəbli küçəsinin bir hissəsi müvəqqəti olaraq bağlanıb. Sürücülərin yolunu qısaltmaq üçün həmin küçənin digər hərəkət hissəsini ikitərəfli təşkil ediblər. Lakin müvafiq yol nişanlarını quraşdırmaq yaddan çıxdığı üçün sürücülər çaş-baş qalır.

Avtosfer.az xəbər verir ki, yolun bağlanması və həmin küçəyə girişin qadağan edilməsi ilə bağlı heç bir nişan quraşdırılmayıb. Eyni zamanda ikitərəfli təşkil edilmiş yola nə məcburi hərəkət istiqaməti nişanı, nə ikitərəfli hərəkəti bildirən xəbərdarlıq nişanı quraşdırılıb. Sürücülər bir-birinə baxaraq həmin küçəyə daxil olurlar. Cərimə olunmaqdan çəkinənlər isə ümumiyyətlə həmin küçəyə daxil olmağa risk etmirlər.

Sürücülər Azərbaycan Yerüstü Nəqliyyat Agentliyindən və Dövlət Yol Polisi İdarəsindən həmin əraziyə yol nişanlarının quraşdırılmasını xahiş edirlər.

Fərid