Avtomobil nəhəngləri çip çatışmazlığı fonunda istehsalı dayandıra bilərlər

Almaniyanın avtomobil nəhəngi “Volkswagen” şirkəti çip tədarükündə yaranan böhran səbəbindən Volfsburqdakı zavodunda “Golf” modelinin istehsalını oktyabrın 23-dən dayandıracaq.

Avtosfer.az “Bild” qəzetinə istinadla xəbər verir ki, şirkətin planına əsasən, bu addımdan sonra “Tiguan”, “Touran” və “Tayron” modellərinin istehsalı da mərhələli şəkildə məhdudlaşdırılacaq. İstehsalın dayandırılmasına səbəb “Nexperia” şirkətindən çip tədarükünün kəsilməsidir. “Nexperia”nın əsas istehsalı Çində yerləşir və Çin hökuməti ABŞ-la yaranan gərginlik fonunda çiplərin ixracını qadağan edib.

“Volkswagen”in məlumatına görə, alternativ çip istehsalçılarının məhsulları sertifikatlaşdırma mərhələsindədir və bu səbəbdən qısa müddətdə istehsalda istifadə oluna bilmir. Hazırda şirkət rəhbərliyi istehsalın hansı zavodlarda və hansı ardıcıllıqla azaldılacağına dair plan hazırlayır. Problem ilk növbədə “Volkswagen” markasının əsas zavodlarına, daha sonra isə “Audi”, “Seat”/“Cupra” və digər markaların istehsal xətlərinə təsir edəcək.

Volfsburqdan sonra şirkətin daha bir neçə zavodlarının da fəaliyyətinin müvəqqəti dayandırılması gözlənilir.

Qeyd edək ki, çip çatışmazlığı nəticəsində Almaniyada on minlərlə işçinin müvəqqəti işsizlik riski ilə üzləşəcəyi ehtimal olunur.