"Bentley" ən yüngül avtomobilini buraxacaq - FOTO

Debütdən 100 il sonra "Supersports" adlı "Bentley" modeli istehsala qayıdır.

Avtosfer.az auto.ru-ya istinadən xəbər verir ki, 1925-ci ildə "Supersports" 160 km/saat (100 mil/saat) sürət həddini aşan ilk "Bentley" modeli olub və onun yubileyini qeyd etmək üçün şirkət "Continental GT Supersports" modelini hazırlayır.

Yeni model üçün sifarişlər 2026-cı ilin mart ayında açılacaq. O standart "Continental GT"dən təxminən yarım ton yüngüldür. Kupenin çəkisi iki tondan (dəqiq desək, 1814,37 kiloqram) azdır və bu göstərici ilə "Supersports" son 85 ilin ən yüngül "Bentley" avtomobilidir.

"Continental GT Supersports" 666 at gücü olan 4,0 litrlik V8 mühərriki ilə təchiz olunub. Yeni avtomobilin 0-dan 100 km/saat-a 3,7 saniyəyə sürətlənəcəyi, maksimal sürətinin isə 310 km/saat olacağı gözlənilir.