Elektrikli avtomobil bazarında liderliyi itirdilər

Elektrikli avtomobil bazarında rəqabət getdikcə güclənir. Çin markası BYD satışlarında ardıcıl azalma müşahidə olunduqdan sonra liderliyini itirərək ikinci yerə geriləyib.

Avtosfer.az xəbər verir ki, şirkətin yayımladığı məlumata görə, oktyabr ayındakı satışlar ötən ilin eyni dövrü ilə müqayisədə 12 faiz azalaraq, 441 min 706 ədədə düşüb.

BYD-nin səhmləri Honkonq birjasında 1,9 faiz ucuzlaşaraq 98,70 Honkonq dollarına enib. Bu, 5 fevraldan bəri ən aşağı bağlanış səviyyəsi olub. Ümumilikdə şirkətin səhm dəyəri may ayındakı zirvəsindən bəri təxminən 36 faiz azalıb.

Satışlardakı azalma əvvəllər yüksəlişdə olan BYD üçün mənfi tendensiyanın davamı hesab edilir. Çin hökumətinin endirim siyasətlərinə qarşı sərt addımlar atması və şirkətin əsas modellərindən birini məhdudlaşdırması BYD-nin ardıcıl iki rüb ərzində mənfəət azalması ilə üzləşməsinə səbəb olub.

Ötən ay 453 min 978 avtomobil satan “SAIC Motor” da Çində ən çox satılan avtomobil markası adını itirib.

Digər tərəfdən, “Geely Automobile Holdings”, “Nio”, “Xpeng” və “Zhejiang Leapmotor Technology” oktyabrda rekord satış nəticələri açıqlayıblar. Yeni bazar iştirakçısı “Xiaomi” də güclü ay keçirdiyini bildirib. “Li Auto” isə ardıcıl beşinci ay satış azalması ilə mübarizə aparır.