Elektrikli avtomobillər son 20 faizi niyə gec yığır? – Səbəb açıqlandı

Elektrikli avtomobil sahiblərinin çoxu batareyanın 80 faizə qədər sürətlə dolduğunu, bundan sonra isə şarj prosesinin xeyli yavaşladığını müşahidə edir.
Avtosfer.az "Qaynarinfo"ya istinadən xəbər verir ki, "Supercar Blondie" bunun səbəblərini izah edib.

Məlumata görə, batareya 80 faizə qədər dolarkən daxilində enerji üçün kifayət qədər boş yer olur və bu səbəbdən enerji sürətlə ötürülür. Lakin batareya tam dolmağa yaxınlaşdıqca proses daha mürəkkəb hala gəlir. Mütəxəssislər bildirirlər ki, son 20 faizdə təhlükəsizlik limiti işə düşür. Batareyanın dolması ilə gərginlik artır və təhlükəli səviyyəyə yaxınlaşır. Bu səbəbdən elektromobilin idarəetmə sistemi, yəni "beyni” batareyanın həddindən artıq isinməsinin və tez köhnəlməsinin qarşısını almaq üçün enerji ötürülməsini avtomatik şəkildə azaldır.

Batareyanın işi litium-ionların anodlara hərəkəti prinsipi ilə qurulub. Əgər enerji çox sürətli ötürülsə, litium-ionlar düzgün yerləşə bilməz. Bu proses "litium örtüklənməsi” adlanır və baş verdikdən sonra onu aradan qaldırmaq mümkün olmur.

Məhz buna görə bir çox elektromobil istehsalçıları batareyanın gündəlik istifadədə 80 faizdən artıq doldurulmamasını tövsiyə edirlər. Bu üsul həm kifayət qədər yürüş məsafəsi təmin edir, həm şarj müddətini qısaldır, həm də batareyanın ömrünü qorumağa kömək edir.

Bu arada "BMW" şirkətinin batareya istehsalı üzrə direktoru Markus Fallbohmer və "BMW" Neue Klasse proqramının rəhbəri Mike Reichelt Çin istehsalı olan bəzi elektromobillərin yüksək sürətli şarj imkanlarının müəyyən mənfi təsirlərlə müşayiət olunduğunu bildiriblər.

Onların sözlərinə görə, şarj sürətini artırmaq mümkündür, lakin bu zaman batareyanın davamlılığı və digər texniki göstəricilər baxımından kompromislərə getmək lazım gəlir.