Halqalarsız ilk "Audi" yarım saat ərzində 10 min sifariş topladı - FOTO

Yeni "AUDI E5 Sportback" elektrik avtomobili Çində satışa çıxarıldıqdan sonra 30 dəqiqə ərzində 10 mindən çox sifariş toplayıb.

Avtosfer.az bu barədə "CarNewChina" nəşrinə istinadla xəbər verir.

Onun qiyməti 235 900 yuandan (təqribən 57 min manat - red.) başlayır.

Avtomobil Çinin SAIC ilə Almaniyanın "Audi" şirkətlərinin birgə müəssisəsi tərəfindən istehsal olunur.

"E5 Sportback" yenilənmiş AUDI brendinin ilk avtomobilidir. Yeni brend yalnız böyük hərflərlə yazılır. Onun əsas xüsusiyyəti emblemində ənənəvi dörd halqanın olmamasıdır.

Elektrik avtomobili 299-dan 787 at gücünə qədər güc qurğularına malikdir. Ən güclü versiyasında "AUDI E5 Sportback" 3,4 saniyəyə yerindən 100 km/saat həddinə çata bilir. 800 voltluq akkumulyatorun bir dəfə doldurulması ilə maksimum 770 km məsafə qət etmək mümkündür.