Maşının şüşəsinə gerb yapışdıranları nə gözləyir? - AÇIQLAMA

son günlər sosial şəbəkələrdə müzakirə olunan məsələlərdən biri də avtomobillərin üzərinə stiker formasında dövlət gerbinin yapışdırılması ilə bağlıdır. Bəzi istifadəçilər bununla bağlı cərimə tətbiq edildiyini iddia edir, bəziləri isə yayılan məlumatların həqiqəti əks etdirmədiyini bildirir.

Bəs avtomobilin üzərinə dövlət gerbinin stiker formasında yapışdırılmasına görə Azərbaycanda hazırda hər hansı cərimə nəzərdə tutulurmu?

Avtosfer.az xəbər verir ki, nəqliyyat eksperti Elməddin Muradlı Redaktor.az-a bununla bağlı hər hansı bir cərimə nəzərdə tutulmadığını bildirib.

"Yalnız bayraqdan istifadə ilə bağlı qanunvericilikdə müəyyən tələblər var və buna əməl etmək lazımdır. Ümumiyyətlə, dövlət atributlarından istifadə zamanı sürücülər diqqətli olmalıdırlar. Gerbin vurulmasına gəlincə, yol hərəkəti təhlükəsizliyi baxımından yanaşsaq, bu, təhlükəli ola bilər. Xüsusən də qabaq alın şüşəsinə yapışdırıldıqda müəyyən dərəcədə görünüş dairəsini məhdudlaşdırır. Məsələn, sağ və ya sol küncdə yerləşdirildikdə sürücü sağa-sola dönərkən qapı dirəyinin, yaxud da kor nöqtənin təsiri ilə yanaşı, gerbin görüntünü məhdudlaşdırması səbəbindən piyadanı və ya hər hansı maneəni görməyə bilər. Bu cür risklər mövcuddur. Biz bunu deyirik, bəzi insanlar gülür, lağ-lağı edir, ciddiyə almır. Amma hadisə başlarına gələndən sonra dərk edirlər ki, bu, həqiqətən təhlükəli imiş".

Ekspert əlavə etdi ki, şüşəyə gerbi yapışdırırlar, müəyyən müddətdən sonra günün təsirindən o, solur və çox pis görüntü yaranır:

"İnsanlar ilk növbədə dövlət atributlarına hörmətlə yanaşmalıdırlar. İkincisi isə, qoruyub saxlaya bilmirlərsə, istifadə etməsinlər. Əsas məsələ təhlükəsizliklə bağlıdırsa, bəli, yol hərəkəti təhlükəsizliyi baxımından da risk yaradır. Buna görə də belə hallardan çəkinmək lazımdır".