"Porsche" Almaniyada daha 4 min işçisini ixtisar edə bilər

Almaniyanın lüks avtomobil brendi olan "Porsche" əlavə 4 min iş yerini ixtisar edə bilər.

Avtosfer.az "Handelsblatt" nəşrinə istinadən xəbər verir ki, şirkət xərclərin optimallaşdırılması üçün yeni tədbirlər planı hazırlayır.

Xatırladaq ki, şirkət hələ mart ayında 2029-cu ilədək 3.9 mindən çox əməkdaşla yollarını ayıracağını elan etmişdi. İndi isə həmin plana əlavə olaraq daha 4 min nəfərin işdən çıxarılması ehtimalı nəzərdən keçirilir.

Nəşrin məlumatına görə, yeni ixtisar dalğası əsasən idarəetmə və inzibati bölmələri əhatə edəcək. Bununla yanaşı, Vaysax kommunasında yerləşən mühəndislik və tədqiqat mərkəzində işçilərin sayının 30 faiz azaldılması variantı da araşdırılır.

Şirkət rəsmisi DPA agentliyinə verdiyi açıqlamada optimallaşdırma addımlarının hazırlandığını təsdiq etsə də, ixtisarların dəqiq miqyası barədə məlumat verməyib. Qeyd olunub ki, avtomobil konserninin müvafiq tədbirlər paketi iyul ayının sonunadək hazır olacaq.

Son illər Almaniyanın avtomobil sənayesi ciddi böhranla üz-üzədir. İlkin olaraq koronavirus pandemiyasının səbəb olduğu bu tənəzzül, 2022-ci ildən etibarən enerji daşıyıcılarının qiymətinin kəskin bahalaşması və Çinin elektromobil istehsalçıları ilə rəqabətin güclənməsi fonunda daha da dərinləşib.