"A plus" marketdən alınan yağ kifli çıxdı – VƏTƏNDAŞ ŞİKAYƏTİ - VİDEO

Masazır qəsəbəsində fəaliyyət göstərən “A plus” marketlə bağlı redaksiyamıza şikayət daxil olub.
Avtosfer.az xəbər verir ki, narazılıq edən şəxs iyunun 5-də adıçəkilən marketdən etdiyi alış-veriş zamanı ciddi problem yaşandığını bildirib.

Onun sözlərinə görə, həmin gün marketdən müxtəlif ərzaqlarla yanaşı, Yeni Zelandiyada istehsal olunduğu bildirilən yağ məhsulu da alıb. Lakin evə gəlib məhsulu açdıqda xoşagəlməz mənzərə ilə qarşılaşıb.
Vətəndaş qeyd edir ki, yağın qablaşdırması tam orijinal vəziyyətdə olub və məhsulu aldığı zaman xaricdən görünən heç bir problem müşahidə etməyib. Lakin qablaşdırmanı açdığı an səthində aydın şəkildə kif izləri və üfunət hiss olunub. Bu hal onu dərindən narahat edib və məhsulun keyfiyyətinə şübhə yaradıb.
Daha sonra məhsulun üzərindəki etiketi diqqətlə yoxlayan vətəndaş maraqlı bir detalı da aşkar edib. O görüb ki, yağın son istifadə tarixinə cəmi bir gün qalıbmış.
Qeyd edək ki, marketlərdə yağ, ət və süd məhsulları vitrinlərdən azı 3 gün qalmış çıxarılmalıdır.

Fidan