Ağaclar yerindən qopdu: Bakıda güclü külək

“Dünən axşamdan başlayan güclü külək nəticəsində iki ağac kökündən qopub”. 

Bunu Cebhe.info-ya açıqlamasında Bakı Meriyasının Yaşıllaşdırma Təsərrüfatı Birliyinin Bitkilərin mühafizəsi şöbəsinin rəisi Orxan Məmmədov deyib. O, hazırda hadisə yerində fəsadı aradan qaldırmaq üçün tədbirlərin görüldüyünü bildirib: 

“Dünəndən bəri paytaxtda müşahidə olunan güclü küləklə bağlı gücləndirilmiş iş rejiminə keçmişik. İndiyə qədər 6 ağac budağının sınması, 2 ağacın isə kökündən qopması ilə bağlı məlumat daxil olub. Mütəxəssislərimiz bununla bağlı həmin ərazilərə göndərilib və fəsadın aradan qaldırılması ilə məşğuldurlar. Bu hadisə Binəqədi rayonundakı İbrahim Paşa Dadaşov küçəsində olub”. 

Qeyd edək ki, dünəndən başlayan güclü küləklə bağlı Bakı Nəqliyyat Agentliyi (BNA) də vətəndaşlara tövsiyələr verib. Hava şəraiti ilə əlaqədar paytaxt yollarına və ictimai nəqliyyat infrastrukturlarına da nəzarət gücləndirilib.