Anomal istilər: 11 ölü, 5 mindən çox insanı gün vurdu

Yaponiyada baş verən anomal istilərdən həftə ərzində 11 nəfər ölüb. Avtosfer.az “RenTV”yə istinadən xəbər verir ki, daha 5,6 min insan gün vurmadan xəstəxanalara yerləşdirilib. Bu barədə ölkə üzrə Baş Yanğınsöndürmə İdarəsindən məlumat verilib.

Keçən həftə ölkədə yağışlar fəsli başa çatıb və termometrlər yüksələrək 32-33 dərəcəyə çatıb.

Sinoptiklərin proqnozlarına görə, Xonsyu adasının əksər regionlarında bu həftə temperatur +35 dərəcəyə qalxıb.

Ölən və xəsarət alanların əksəriyyəti yaşlı insanlardır. Sakinlər qənaət ucbatından kondisionerləri tez-tez qoşa bilmirlər.

Hökumət əhaliyə açıq havada az olmağı və sudan çox istifadə etməyə çağırıb.

Qeyd edək ki, keçən il Yaponiyada güclü istidən 150 nəfər həyatını itirmişdi.

Namiq Musayev