Avtoservisdən 34 min oğurlayan ustanın məhkəməsi başlayıb

Bakıda işlədiyi avtoservisdən oğurluq etməkdə təqsirləndirilən Camal Nurbabazadənin cinayət işi üzrə ibtidai istintaq başa çatıb. Avtosfer.az-ın "Report"a istinadən xəbərinə görə, cinayət işi baxılması üçün Yasamal Rayon Məhkəməsinə göndərilib.

Hakim Murad Məmmədovun icraatında olan iş üzrə hazırlıq iclası noyabrın 12-ə təyin edilib.

Qeyd edək ki, hadisə bu ilin iyul ayında Yasamal rayonu ərazisində baş verib.

Yasamal Rayon Polis İdarəsinin 28-ci Polis Bölməsi əməkdaşlarının keçirdikləri əməliyyat tədbirləri nəticəsində iyulun 19-da rayon ərazisindəki avtoservislərin birindən 34 min manat pul oğurlamaqda şübhəli bilinən, orada usta işləyən Siyəzən rayon sakini C.Nurbabazadə saxlanılıb.

Ona Cinayət Məcəlləsinin 177.2.3-cü (oğurluq - yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla törədildikdə) maddəsi ilə ittiham verilib.