Azərbaycan üzərindən yeni yük marşrutu sülhə töhfə verə bilər? – AÇIQLAMA

Rusiyadan Ermənistana Azərbaycan ərazisi üzərindən yük daşımalarının həyata keçirilməsi regionda nəqliyyat əlaqələrinin bərpası və yeni marşrutların formalaşması baxımından diqqət çəkir.

Avtosfer.az xəbər verir ki, bu marşrutun istifadəyə verilməsi Azərbaycan və Ermənistan arasında praktiki əməkdaşlığın genişlənməsi baxımından da əhəmiyyətli addım kimi qiymətləndirilir. Daşımaların davamlı xarakter alması isə Azərbaycanın Cənubi Qafqazda tranzit və logistika imkanlarını daha da genişləndirə bilər. Bəs bu marşrut Azərbaycan-Ermənistan münasibətlərinə və sülh prosesinə necə təsir göstərə bilər?

Mövzu ilə bağlı politoloq Zeynal Əmrəliyev Avtosfer.az-a açıqlamasında bildirib ki, Rusiyadan Ermənistana Azərbaycan ərazisi vasitəsilə yük daşımalarının həyata keçirilməsi iki ölkə arasında etimad mühitinin formalaşmasına müsbət təsir göstərə biləcək mühüm addımlardan biri kimi qiymətləndirilə bilər:

"Bu cür iqtisadi və nəqliyyat əməkdaşlığı tərəflər arasında qarşılıqlı asılılıq elementlərini gücləndirməklə yanaşı, uzun illər ərzində formalaşmış inamsızlığın tədricən aradan qaldırılmasına da xidmət edir. Xüsusilə, nəqliyyat-kommunikasiya əlaqələrinin bərpası və fasiləsiz fəaliyyət göstərməsi tərəflər arasında dialoqun genişlənməsinə, praktiki əməkdaşlıq mexanizmlərinin formalaşmasına və qarşılıqlı etimadın möhkəmlənməsinə şərait yarada bilər. Bu baxımdan, sözügedən marşrutun fəaliyyəti sülh müqaviləsinin imzalanması istiqamətində mövcud olan həm psixoloji, həm də praktiki baryerlərin aşılmasına töhfə verərək danışıqlar prosesinə əlavə konstruktiv dinamika qazandıra bilər. Çünki beynəlxalq təcrübə göstərir ki, kommunikasiyaların açılması, ticarət əlaqələrinin genişlənməsi və iqtisadi inteqrasiya elementlərinin güclənməsi dövlətlər arasında qarşıdurma riskini azaldan, sabitliyi möhkəmləndirən və uzunmüddətli sülhün təmin olunmasına xidmət edən ən etibarlı mexanizmlərdən hesab olunur. İqtisadi maraqların qarşılıqlı şəkildə uzlaşması siyasi münasibətlərin də daha praqmatik müstəviyə keçməsinə şərait yaradır".
Politoloq qeyd edib ki, eyni zamanda, bu marşrutun davamlı və institusional xarakter alması Azərbaycanın tranzit ölkə kimi rolunu daha da gücləndirəcək:
"Azərbaycan yalnız Şərq–Qərb nəqliyyat dəhlizinin əsas iştirakçılarından biri deyil, həm də Şimal–Cənub beynəlxalq nəqliyyat dəhlizinin mühüm halqası kimi mövqeyini daha da möhkəmləndirəcək. Bununla yanaşı, ölkə regiondaxili nəqliyyat və logistika şəbəkələrinin əlaqələndirilməsində aparıcı qovşağa çevrilərək müxtəlif istiqamətlər üzrə yük axınlarının təhlükəsiz, sürətli və səmərəli şəkildə təşkilində strateji üstünlük əldə edəcək. Belə bir inkişaf Azərbaycanın tranzit və logistika xidmətlərindən əldə etdiyi gəlirlərin artmasına, nəqliyyat infrastrukturuna qoyulan investisiyaların səmərəliliyinin yüksəlməsinə, yeni iqtisadi imkanların yaranmasına və ölkənin beynəlxalq ticarət marşrutlarında rolunun genişlənməsinə şərait yaradacaq. Bununla yanaşı, Azərbaycanın Cənubi Qafqazın əsas logistika və nəqliyyat mərkəzi kimi geosiyasi çəkisi əhəmiyyətli dərəcədə artacaq, regional iqtisadi əməkdaşlığın dərinləşməsi və təhlükəsizlik mühitinin möhkəmlənməsi baxımından ölkənin strateji əhəmiyyəti daha da yüksələcək.
 Nəticə etibarilə, sözügedən marşrut təkcə iqtisadi deyil, həm də siyasi, geostrateji və təhlükəsizlik aspektlərindən regionun gələcək inkişafına təsir göstərə biləcək mühüm əməkdaşlıq platformalarından biri kimi çıxış edə bilər".

Fatimə