Azərbaycana qarşı hibrid hücumların məqsədi nədir? – POLİTOLOQ

Milli Məclisin xarici müdaxilələr və hibrid təhdidlərlə bağlı komissiyasının Azərbaycana yönələn hibrid hücumlarla bağlı bəyanatı bu təhdidlərin mahiyyəti və onlara qarşı mübarizə yollarını yenidən gündəmə gətirib.
Müasir dövrdə hibrid təhdidlər yalnız hərbi vasitələrlə deyil, həm də dezinformasiya, kiberhücumlar və informasiya manipulyasiyaları vasitəsilə həyata keçirilə bilər.

Avtosfer.az xəbər verir ki, bu cür təhdidlərin hansı formalarda özünü göstərdiyi, onların arxasında hansı geosiyasi məqsədlərin dayana biləcəyi və Azərbaycanın informasiya təhlükəsizliyinin gücləndirilməsi üçün hansı addımların atılmasının vacibliyi ilə bağlı müzakirələr aktuallaşıb.

Mövzu ilə bağlı politoloq Zeynal Əmrəliyev Avtosfer.az-a açıqlamasında bildirib ki, Azərbaycana qarşı hibrid təhdidlər əsasən dezinformasiya, sosial şəbəkələrdə manipulyasiya, kiberhücumlar, dini və ideoloji təxribatlar, eləcə də cəmiyyətdə süni qarşıdurma yaratmaq cəhdləri formasında özünü göstərə bilər:

"Bu fəaliyyətlərin arxasında Azərbaycanın müstəqil xarici siyasətinə təsir göstərmək, regional mövqelərini zəiflətmək və cəmiyyətdə dövlət institutlarına etimadı sarsıtmaq kimi geosiyasi məqsədlər dayana bilər. 
Lakin konkret hücumların arxasında kimin dayanması yalnız sübutlarla müəyyən edilməlidir.
Belə təhdidlərin qarşısını almaq üçün Azərbaycanın kibertəhlükəsizlik imkanları gücləndirilməli, dövlət qurumları arasında operativ məlumat mübadiləsi təmin olunmalı və dezinformasiyaya qarşı çevik informasiya siyasəti həyata keçirilməlidir. Eyni zamanda, əhalinin media savadlılığının artırılması, saxta məlumatların vaxtında ifşası və ictimaiyyətə şəffaf məlumat verilməsi vacibdir. Çünki hibrid təhdidlərə qarşı mübarizədə təkcə texnologiya deyil, cəmiyyətin dövlətə etimadı və informasiya manipulyasiyalarına qarşı dayanıqlığı da həlledici əhəmiyyət daşıyır".

Fatimə