Azərbaycanda enerjidoldurma məntəqələrinin sayı niyə artmır? – Ekspert AÇIQLADI – VİDEO

Elektromobillər üçün enerjidoldurma məntəqələrinin sayının artırılması yenidən gündəmə gəlib.

Avtosfer.az xəbər verir ki, ölkədə elektromobillərin sayının artmasına baxmayaraq, enerjidoldurma infrastrukturunun inkişaf tempi sürücülərin gözləntilərini tam qarşılamır.  Bəs mövcud vəziyyət elektrik avtomobillərindən istifadənin rahatlığına necə təsir edir və bu sahədə hansı addımlar atılmalıdır?

Mövzu ilə bağlı nəqliyyat eksperti Eldəniz Cəfərli “Xəzər TV” yə açıqlamasında bildirib ki, bu məqsədlə biznes nümayəndələri və sahibkarlar da prosesə cəlb olunub ki, enerjidoldurma məntəqələrinin yaradılması üçün tələb olunan avadanlıqların ölkəyə idxalı zamanı nəzərdə tutulan güzəştlərdən faydalana bilsinlər:

"Dövlət tərəfindən təqdim edilən bu təşviq mexanizmlərinin əsas məqsədi özəl sektorun elektromobil infrastrukturunun inkişafında daha fəal iştirakını təmin etmək, investisiya marağını artırmaq və enerjidoldurma şəbəkəsinin daha sürətlə genişlənməsinə nail olmaqdır. Lakin aparılan müşahidələr göstərir ki, biznes subyektləri bu sahəyə hələ də gözlənilən səviyyədə maraq göstərmirlər. Bunun əsas səbəbləri kimi ilkin investisiya xərclərinin yüksək olması, investisiyanın geri dönüş müddətinin uzun hesab edilməsi, elektromobil istifadəçilərinin sayının hələ məhdud qalması və gələcək gəlirlərlə bağlı qeyri-müəyyənlik göstərilə bilər. Nəticədə enerjidoldurma məntəqələrinin sayının artırılması və yeni məntəqələrin istifadəyə verilməsi prosesi arzu olunan tempdə irəliləmir”.

Ekspert əlavə olaraq qeyd edib ki, enerjidoldurma infrastrukturunun kifayət qədər inkişaf etməməsi isə elektromobillərin geniş yayılmasına mənfi təsir göstərən əsas amillərdən biri hesab olunur.:
“Çünki potensial alıcılar avtomobillərini rahat şəkildə enerji ilə təmin edə bilməyəcəkləri narahatlığı səbəbindən elektromobil almaq qərarını təxirə salır və ya ənənəvi daxili yanma mühərrikli nəqliyyat vasitələrinə üstünlük verirlər".

Fatimə