Azərbaycanda logistika sahəsində xidmətlərin həcmi necə böyüyüb? - İQTİSADÇI

Azərbaycanda nəqliyyat və anbar təsərrüfatı sahəsində artım diqqət çəkir. 2026-cı ilin yanvar-iyul aylarında bu sahədə 9,2 milyard manatdan çox xidmət göstərilib və xidmətlərin real həcmi əvvəlki ilin eyni dövrü ilə müqayisədə 7,1 faiz artıb. Eyni zamanda, ölkə üzrə yükdaşımaların həcmi 2,8 faiz yüksəlib. 
Avtosfer.az xəbər verir ki, göstəricilər nəqliyyat və logistika sektorunda artımın yükdaşımaların fiziki həcmini üstələdiyini göstərir. Bəs bu fərq hansı iqtisadi amillərlə bağlıdır və Azərbaycanın logistika potensialının inkişafında nəqliyyat və anbar xidmətlərinin rolu nə qədər böyükdür?
Mövzu ilə bağlı iqtisadçı Natiq Cəfərli Avtosfer.az-a açıqlamasında bildirib ki, Azərbaycan uzun illərdir logistika mərkəzinə çevrilmək istiqamətində müxtəlif layihələr həyata keçirir və bu sahəyə böyük həcmdə investisiyalar yatırır:

''Bakı Limanının inşası, yeni dəmir və avtomobil yollarının çəkilməsi, Şərq-Qərb dəhlizinin inkişafı, eləcə də Bakı-Tbilisi-Qars dəmir yolu xətti vasitəsilə yükdaşımaların artırılması bu istiqamətdə atılan mühüm addımlardandır. Bütün bunlar, təbii ki, nəqliyyat və anbar xidmətlərinə tələbatı artıran əsas amillər sırasındadır. Azərbaycanın yerləşdiyi coğrafi mövqe də ölkənin logistika imkanlarının genişləndirilməsi üçün əlverişli şərait yaradır. Bu baxımdan, logistika sektorunun inkişafı ölkə iqtisadiyyatı üçün kifayət qədər əhəmiyyətlidir''.
İqtisadçı qeyd edib ki, ümumiyyətlə, Azərbaycanın gələcək iqtisadi modelində logistika mərkəzi kimi mövqeyinin gücləndirilməsi mühüm rol oynaya bilər:
''Bu sahənin inkişafı yeni iş yerlərinin yaradılmasına, əlavə iqtisadi imkanların formalaşmasına və müxtəlif biznes sahələrinin inkişafına şərait yarada bilər. Müəyyən artım müşahidə olunur, lakin həcmlər hələ arzuolunan səviyyədə deyil. Bu baxımdan, dövriyyənin və yük axınlarının daha da artırılmasına ehtiyac var. Çünki logistika sektorunda fəaliyyətin genişlənməsi yalnız iri şirkətlər üçün deyil, kiçik və orta sahibkarlıq subyektləri üçün də yeni imkanlar yarada bilər. Ümumilikdə isə istiqamət müsbətdir. Azərbaycanın böyük logistika mərkəzinə çevrilməsi gələcək iqtisadi modeldə mühüm rol oynaya biləcək və ölkənin regional iqtisadi əhəmiyyətini daha da artıracaq amillərdən biridir''.

Fatimə