Azərbaycandakı magistral yolların başlanğıc nöqtəsi haradır? – Ekspert AÇIQLADI

Respublika əhəmiyyətli magistral avtomobil yollarının başlanğıc nöqtəsi ilə bağlı maraqlı məqam açıqlanıb. 

Avtosfer.az xəbər verir ki, nəqliyyat eksperti Rauf Ağamirzəyev bu barədə məlumat verib.

Ekspert bildirib ki, “Avtomobil yolları haqqında” Qanunun 24-cü maddəsinə əsasən, ölkədə bütün əsas magistral yolların başlanğıc nöqtəsi paytaxtın mərkəzində yerləşən “Azadlıq” meydanı hesab olunur.

Onun sözlərinə görə, bu yanaşma yalnız rəmzi xarakter daşımır. Belə ki, məsafələrin hesablanması, yol infrastrukturunun planlaşdırılması və idarəetmə prosesində vahid sistemin formalaşdırılması baxımından bu prinsip mühüm əhəmiyyət daşıyır.

Rauf Ağamirzəyev qeyd edib ki, Bakıdan başlayan əsas magistral istiqamətlər də məhz bu nöqtədən hesablanır. Bunlara M-1 (Bakı–Quba–Rusiya sərhədi), M-2 (Bakı–Ələt–Qazax–Gürcüstan sərhədi) və M-4 (Bakı–Şamaxı–Yevlax) avtomobil yolları daxildir.

Ekspert vurğulayıb ki, vahid başlanğıc nöqtəsinin müəyyən edilməsi ölkə üzrə nəqliyyat sisteminin koordinasiyasını asanlaşdırır və idarəetmədə dəqiqliyi artırır. Onun sözlərinə görə, bir çox vətəndaşın hər gün yanından keçdiyi Azadlıq meydanı əslində Azərbaycanın bütün yollarının başlanğıc nöqtəsi hesab olunur.

Eltac Zülfüqaroğlu