Azərbaycanın da daxil olduğu 5 ölkəni birləşdirəcək avtomobil yolu QURULUR

Xəzər dənizi hövzəsində yerləşən beş ölkəni birləşdirəcək regional avtomobil nəqliyyatı marşrutunun yaradılması istiqamətində mühüm layihələr həyata keçirilir. Yeni yol infrastrukturu həm regiondaxili əlaqələrin, həm də beynəlxalq yükdaşımaların inkişafına töhfə verəcək.

Avtosfer.az xəbər verir ki, nəqliyyat eksperti Rauf Ağamirzəyev bu barədə danışarkən bildirib ki, Həştərxan–Atırau avtomobil yolunun tikintisinin başa çatdırılması layihənin reallaşmasında mühüm mərhələdir.

Atırau şəhərinin girişindəki son 5 kilometrlik yol hissəsi tamamlanıb, həmçinin 89 metr uzunluğunda dəmir yolu keçidi inşa edilib. Magistralın 2026-cı ilin noyabr ayının sonunadək istifadəyə verilməsi planlaşdırılır.

Ekspert qeyd edib ki, Türkmənistan da bu istiqamətdə infrastruktur layihələrini davam etdirir. Belə ki, 2026-cı il noyabrın 5-də Türkmənbaşı–Qarabogaz–Qazaxıstan sərhədi avtomobil yolunun 44 kilometrlik hissəsi istifadəyə verilib. Qazaxıstan ərazisində isə Janaozen–Temir-Baba sərhəd-keçid məntəqəsi istiqamətində avtomobil yolunun modernləşdirilməsi işləri aparılır.

Rauf Ağamirzəyevin fikrincə, bu layihələr Azərbaycan, Rusiya, Qazaxıstan, Türkmənistan və İranı birləşdirən regional avtomobil nəqliyyatı şəbəkəsinin formalaşmasına xidmət edir.

2027-ci ildə beş ölkə arasında nəqliyyat əlaqələrinin daha da genişlənməsi gözlənilir. Bununla yanaşı, Türkmənbaşı–Qazaxıstan sərhədi magistralının tam tikintisinin 2028-ci ilədək başa çatdırılması nəzərdə tutulur.

Ekspert vurğulayıb ki, bu layihələr Xəzər regionunda yalnız ölkələrarası avtomobil əlaqələrinin inkişafı baxımından deyil, həm də Şimal–Cənub və Şərq–Qərb beynəlxalq logistika dəhlizlərinin genişləndirilməsi baxımından strateji əhəmiyyət daşıyır.

Eltac Zülfüqaroğlu