Azərbaycanın logistika mərkəzinə çevrilməsi üçün yeni imkanlar yaranır – AÇIQLAMA

Azərbaycan son illərdə tranzit və logistika sahəsində mövqeyini gücləndirmək üçün iri layihələrin icrasını davam etdirir. Bu istiqamətdə beynəlxalq əməkdaşlığın genişləndirilməsi ölkənin regional nəqliyyat qovşağı kimi rolunun daha da möhkəmlənməsinə xidmət edir.

Avtosfer.az xəbər verir ki, Ələt Azad İqtisadi Zonası ilə TRACECA arasında əməkdaşlığın genişləndirilməsi Azərbaycanın tranzit imkanlarının artırılması, logistika infrastrukturunun inkişafı və beynəlxalq yükdaşımalarda rolunun güclənməsi baxımından mühüm əhəmiyyət daşıyır.

Mövzu ilə bağlı iqtisadçı Natiq Cəfərli Avtosfer.az-a açıqlamasında bildirib ki, Azərbaycan uzun illərdir həyata keçirdiyi ardıcıl siyasət nəticəsində regionun mühüm logistika mərkəzlərindən birinə çevrilməyi hədəfləyir:

"Bu istiqamətdə ölkədə genişmiqyaslı layihələr həyata keçirilir və əhəmiyyətli investisiyalar yatırılır. Bu layihələr sırasında Ələt Beynəlxalq Dəniz Ticarət Limanı və Ələt Azad İqtisadi Zonası xüsusi yer tutur. Həmin təşəbbüslər Azərbaycanın yeni logistika mərkəzi kimi formalaşması üçün əlverişli imkanlar yaradır. Bu isə ölkəyə əlavə gəlir mənbələri qazandırmaqla yanaşı, xarici investisiyaların cəlb edilməsi baxımından da mühüm fürsətlər açır. 
TRACECA proqramı çərçivəsində Şərq-Qərb nəqliyyat dəhlizinin daha da inkişaf etdirilməsi nəzərdə tutulur. Bu prosesdə Mərkəzi Asiya respublikalarının və türk dövlətlərinin iştirakının genişlənəcəyi gözlənilir.
Nəticə etibarilə, həyata keçirilən bu addımlar Azərbaycanın iqtisadi potensialının güclənməsinə, beynəlxalq nüfuzunun artmasına və tranzit ölkə kimi mövqeyinin möhkəmlənməsinə müsbət təsir göstərəcək. Əməkdaşlıq genişləndikcə ölkənin tranzitdən əldə etdiyi gəlirlərin də artacağı gözlənilir".

Fatimə