“Bakı-Tbilisi-Qars” xəttinin yükötürmə qabiliyyəti 5 milyon tona çatdırılıb - ADY sədri

Azərbaycan beynəlxalq nəqliyyat dəhlizlərində mövqeyini gücləndirir.

Avtosfer.az xəbər verir ki, bunu “Azərbaycan Dəmir Yolları” QSC-nin sədri Rövşən Rüstəmov REAL Televiziyasına və AZƏRTAC-a müsahibəsində bildirib.

Onun sözlərinə görə, ölkənin həm Şərq-Qərb, həm də Şimal-Cənub beynəlxalq nəqliyyat dəhlizləri üzərində yerləşməsi strateji əhəmiyyət daşıyır və hazırda bu istiqamətlər üzrə genişmiqyaslı infrastruktur layihələri həyata keçirilir.

Rövşən Rüstəmov qeyd edib ki, Şərq-Qərb dəhlizi çərçivəsində Bakı-Böyük Kəsik dəmir yolu xəttinin tam elektrikləşdirilməsi, dəyişən cərəyana keçid və müasir işarəvermə sistemlərinin qurulması istiqamətində işlər görülür. Məqsəd xəttin illik buraxılış gücünü 40 milyon tona çatdırmaqdır.

QSC sədri vurğulayıb ki, “Bakı-Tbilisi-Qars” dəmir yolu xəttinin də buraxılış gücü artırılıb. Belə ki, layihənin yükötürmə qabiliyyəti 1 milyon tondan 5 milyon tona çatdırılıb və hazırda marşrut həm Şərq-Qərb, həm də Qərb-Şərq istiqamətində tam istifadə olunur.

Şimal-Cənub nəqliyyat dəhlizi ilə bağlı layihələrə də toxunan Rövşən Rüstəmov bildirib ki, Bakıdan Yalama istiqamətinə qədər olan hissədə yolun sağlamlaşdırılması işləri başa çatdırılıb. Bu ildən etibarən isə həmin istiqamətdə elektrik və işarəvermə sistemlərinin yenidən qurulmasına başlanılması planlaşdırılır.

Bundan əlavə, Ələt-Osmanlı və Osmanlı-Astara istiqamətlərində də modernləşdirmə işlərinin davam etdiyi qeyd olunub. Astara terminalında işlərin 92 faizinin tamamlandığını bildirən QSC sədri yaxın aylarda terminalın tam istifadəyə veriləcəyini açıqlayıb. Terminalın illik 4 milyon tona qədər yük aşırma gücünə malik olacağı vurğulanıb.

Rövşən Rüstəmov həmçinin bildirib ki, son illərdə regionda baş verən geosiyasi proseslər Orta Dəhlizə marağı daha da artırıb. Onun sözlərinə görə, Azərbaycan Dəmir Yollarının təşəbbüsü ilə yaradılan “Avrasiya Nəqliyyat Marşrutu” Beynəlxalq Assosiasiyası da bu istiqamətdə əməkdaşlığın genişlənməsinə töhfə verir.

QSC sədri qeyd edib ki, əsas hədəflərdən biri beynəlxalq dəhlizlərdə yükdaşımaların sürətini, təhlükəsizliyini və rəqəmsal idarəetməni daha da təkmilləşdirməkdir.