Bakıda 2 avtobus toqquşdu - 7 qadın yaralandı

Yeni Ramana yolunda, Pedoqoji kollecin yaxınlığında ağır yol-nəqliyyat hadisəsi baş verib. Səhiyyə Nazirliyindən Avtosfer.az-a daxil olan məlumata görə, hadisə yerinə bir neçə təcili yardım briqadası yollanıb. Müxtəlif dərəcəli bədən xəsarətləri alan 6 qadın Təcili Tibbi Yardım avtomobili, 1 qadın isə şəxsi avtomobillə  3 saylı şəhər xəstəxanasına çatdırılıb. 

Vəziyyətləri orta- ağır kimi qiymətləndirilir.

Qəza 49 və 106 saylı sərnişin avtobuslarının toqquşması nəticəsində baş verib. Bakı Nəqliyyat Agentliyindən Avtosfer.az-a bildirilib ki, bir qədər əvvəl daşıyıcı Nazim Qəhrəmanovun müvəqqəti istismarında olan 106 nömrəli müntəzəm marşrut xətti üzrə hərəkətdə olan 99 RS 657 dövlət qeydiyyat nişanlı avtobus, “Azland Plaza” MMC-nin müvəqqəti istismarında olan 49 nömrəli müntəzəm marşrut xətti üzrə avtobusla toqquşub. Nəticədə 7 nəfər sərnişin xəsarət alıb. Hadisə ilə əlaqədar Bakı Nəqliyyat Agentliyi tərəfindən araşdırmalara başlanılıb. Hər iki daşıyıcıdan yol nəqliyyat hadisəsi ilə bağlı izahat tələb olunub. 

Emin