Bakıda ağacların budaqları arasında qalan yol nişanı – Sürücülər cərimələnir - VİDEO

Paytaxtda yol nişanlarının ağacların budaqları arasında görünməz vəziyyətdə qalması ilə bağlı sürücülərdən redaksiyamıza şikayət daxil olub. Sözügedən küçələrdən biri paytaxtın Nizami rayonu, Əliağa Kürçaylı 3 küçəsi ilə Əliağa Kürçaylı 17 küçəsinin kəsişməsində yerləşir. Görüntülərdə yol nişanının ağacın arxasında qalması sürücülərin narazılığına səbəb olub. Avtosfer.az-ın məlumatına görə, "Bizim.Media"ya danışan sürücülər bildirirlər ki, nişanın bu vəziyyətdə olması hərəkət təhlükəsizliyi üçün risk yaradır və bəzi hallarda sürücülərin qaydaları bilmədən pozmasına səbəb olur. Bu isə onların əsassız yerə cərimələnməsi ilə nəticələnir.
Məsələ ilə bağlı Azərbaycan Yerüstü Nəqliyyat Agentliyinə (AYNA) müraciət etdik. Qurumdan bildirildi ki, paytaxtın küçə və prospektlərində agentlik tərəfindən mütəmadi təhlillər aparılır.

“Yol nişanlarının görünməsi məhdudlaşdığı hallarda Bakı Şəhər Yaşıllaşdırma Təsərrüfatı Birliyinə rəsmi müraciət göndərilir. Ağacların budanması zamanı bu cür problemlər aradan qaldırılır”, - AYNA-nın məlumatında qeyd olunur. Qurum həmçinin əlavə edib ki, bu kimi hallarla rastlaşan vətəndaşlar AYNA-nın rəsmi əlaqə vasitələri və ya “Açıq hökumət” platformaları üzərindən müraciət edə bilərlər. Bakı Şəhər Yaşıllaşdırma Təsərrüfatı Birliyi ilə əlaqə cəhdlərimiz isə boşa çıxdı.

Mövzunu diqqətdə saxlayacağıq...