Bakıda avtoservisdən avtomobil qaçıran usta köməkçisinin məhkəməsi başlayır

Bakıda avtomobil qaçırmaqda təqsirləndirilən Tərlan Qasımovun cinayət işi üzrə ibtidai istintaq başa çatıb. Avtosfer.az-ın "Report"a istinadən xəbərinə görə, cinayət işi baxılması üçün Nərimanov Rayon Məhkəməsinə göndərilib. Hakim Samir Məmmədovun icraatında olan iş üzrə hazırlıq iclası oktyabrın 18-nə təyin edilib.

Qeyd edək ki, hadisə bu ilin avqust ayında Bakının Nərimanov rayonu ərazisində baş verib.

Şıxəliyev küçəsində yerləşən avtoservisdə usta köməkçisi işləyən Saatlı rayon sakini, 1992-ci il təvəllüdlü Qasımov Tərlan Məmməd oğlu "Azevrostar" şirkətinə məxsus "Niva" markalı avtomobili qaçırıb. Onun hadisəni törədən vaxt sərxoş olduğu bildirilir. Polis tərəfindən saxlanılan T.Qasımov məsuliyyətə cəlb edilib.

Ona Cinayət Məcəlləsinin 185.1-ci (talama məqsədi olmadan qanunsuz olaraq avtomobil və ya başqa nəqliyyat vasitəsi ələ keçirmə) maddəsi ilə ittiham verilib.