Bakıda piyada keçidləri hər kəs üçün əlçatandırmı? – ARAŞDIRMA – FOTO

Bakıda bəzi yerüstü piyada keçidlərinin yaşlı insanlar, uşaq arabası ilə hərəkət edən valideynlər və əlilliyi olan şəxslər üçün əlçatanlığı ilə bağlı suallar yaranıb.

Avtosfer.az xəbər verir ki, “Bakı Gündəliyi” səhifəsi sosial şəbəkə hesabında paylaşım edərək yerüstü piyada keçidlərinin piyadaların təhlükəsizliyi ilə yanaşı, rahatlığını da təmin etməli olduğunu vurğulayıb.

Paylaşımda qeyd olunub ki, yalnız eskalatorlarla təchiz edilən keçidlərdən yaşlı insanların və uşaq arabası ilə hərəkət edən valideynlərin necə istifadə etməli olduğu aydın deyil. Xüsusilə əlil arabasında olan şəxslərin belə keçidlərdən istifadəsi daha ciddi problem yarada bilər.

“Bakı Gündəliyi”nin paylaşdığı fotoda Atatürk parkının ətrafında yerləşən yerüstü piyada keçidlərindən biri əks olunub. Bildirilib ki, həmin keçiddə bəzən eskalatorların heç biri işləmir, bəzi hallarda isə yalnız yuxarı istiqamətdə hərəkət edən eskalator istifadəyə verilir. Keçiddə liftin də olmadığı diqqətə çatdırılıb.

Bu cür keçidlər layihələndirilərkən bütün piyadaların, o cümlədən hərəkət imkanları məhdud şəxslərin ehtiyacları nəzərə alınmalıdır.

Paylaşımda eskalatorlarla yanaşı, təhlükəsiz və rahat rampaların (maili yolların) yaradılmasının mümkün həllərdən biri olduğu qeyd edilib.

Ekspertlər daha optimal variant kimi isə bəzi yerüstü piyada keçidlərinin sökülərək onların əvəzinə işıqforla tənzimlənən piyada keçidlərinin yaradılmasını təklif edib.

Eltac Zülfüqaroğlu