Bakıda torpaqların bahalaşması mənzil qiymətlərinə təsir edəcək? - AÇIQLAMA

Bakıda torpaq qiymətlərində müşahidə olunan artım son aylarda daşınmaz əmlak bazarında ən çox müzakirə edilən məsələlərdən birinə çevrilib. 
Avtosfer.az xəbər verir ki, paytaxtın müxtəlif ərazilərində torpaq sahələrinin bahalaşması həm alıcıların, həm də investorların diqqətini cəlb edir. 
Bəs Bakıda torpaq qiymətlərinin son aylarda sürətlə artmasının əsas səbəbləri hansılardır?

Mövzu ilə bağlı iqtisadçı Xalid Kərimli Avtosfer.az-a açıqlamasında bildirib ki, torpaq məhdud resursdur və ona olan tələbat daim yüksəkdir:

“Məhz buna görə də uzunmüddətli dövrdə torpaq qiymətlərinin artması təbii proses hesab olunur. Mənzillərin sayını artırmaq mümkündür. Daha çoxmərtəbəli binalar tikmək olar. Lakin torpağın həcmini artırmaq mümkün deyil. Bu səbəbdən torpaq bazarında qiymət artımı daha davamlı xarakter daşıyır. Torpaq qiymətləri adətən yalnız ölkədə iqtisadi vəziyyət zəiflədikdə və tikinti fəaliyyətinə tələbat azaldıqda ucuzlaşır. Bu baxımdan torpaq qiymətlərinin enməsi iqtisadiyyat üçün müsbət göstərici sayılmır. Çünki bu, tikinti sektorunda və ümumilikdə bazarda fəallığın azalmasından xəbər verir".

İqtisadçı əlavə edib ki, torpaq qiymətlərinin bahalaşması mənzil bazarına da birbaşa təsir göstərir:

“Torpağın dəyərinin artması tikinti xərclərini yüksəldir və nəticədə mənzil qiymətlərinin bahalaşmasına səbəb olur. Bakıda son illərdə mənzil qiymətlərində müşahidə olunan artımın əsas səbəblərindən biri də məhz torpaq sahələrinin bahalaşmasıdır”.

Fatimə Dadaşova