Bank işçisini maşınla vurub öldürən yeniyetmə apellyasiya şikayəti verib

Bakı Apellyasiya Məhkəməsində qadının ölümünə səbəb olmaqda təqsirli bilinən Qurbanəli Qurbanovun barəsindəki hökmdən verilən apellyasiya şikayətləri üzrə ilkin baxış iclası keçirilib. Avtosfer.az-ın "Report"a istinadən xəbərinə görə, hakim Həsən Əhmədovun sədrliyi ilə keçirilən iclasda anket məlumatları dəqiqləşdirilib. Baxış iclası noyabrın 18-nə təyin edilib.

Qeyd edək ki, Q.Qurbanov Bakı Ağır Cinayətlər Məhkəməsinin hökmü ilə 3 il azadlıqdan məhrum edilib. Hadisə ötən il dekabrın 21-i saat 19 radələrində Xətai rayonu Nobel prospektində baş verib. Q.Qurbanov idarə etdiyi “Nissan” markalı avtomobillə Bakı şəhər sakini, 1981-ci il təvəllüdlü Ləman Süleymanlını vurub.

Hadisə yerindən qaçan Q.Qurbanov saxlanılan zaman məlum olub ki, onun 16 yaşı var və sürücülük vəsiqəsi yoxdur.

Ona Cinayət Məcəlləsinin 263-1.3 (Yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma ehtiyatsızlıqdan zərərçəkmiş şəxsin ölümünə səbəb olduqda) və 264-cü (Yol nəqliyyat hadisəsi yerindən qaçma) maddələri ilə ittiham verilib.

Dünyasını dəyişən Ləman Süleymanlı "Azər-Türk Bank"da mühasib - şöbə müdiri vəzifəsində çalışıb.