Biləcəridə qazılan yol sürücülər üçün təhlükə yaratmağa davam edir - VİDEO

Paytaxtın Binəqədi rayonu, Biləcəri qəsəbəsi, Yəhya Hüseynov küçəsində yolun asfalt örtüyünün qazılaraq yararsız vəziyyətdə saxlanılması sakinlərin narazılığına səbəb olub.

Bu barədə ərazi sakinləri Avtosfer.az-a müraciət edərək bildiriblər ki, küçədə aparılan qazıntı işlərindən sonra yolun asfalt örtüyü bərpa edilməyib. Onların sözlərinə görə, artıq uzun müddətdir yol bu vəziyyətdə qalıb.

Sakinlər qeyd ediblər ki, yaranmış çökəkliklər və çalalar səbəbindən ərazidən keçən sürücülər hərəkətdə çətinlik yaşayırlar. Sürücülər avtomobillərinin zədələnməməsi üçün məcburi şəkildə sola manevr edirlər. Əks halda nəqliyyat vasitələri çökəkliyə düşərək maddi ziyan görür.

Sakinlər aidiyyəti qurumlardan problemin qısa zamanda aradan qaldırılmasını və yolun yenidən asfaltlanmasını tələb edirlər.

Nərmin