Binəqədidə kanalizasiya suyu yola axdı; qurum hərəkətə keçdi - FOTO

Paytaxtın Bakı şəhərinin Binəqədi rayonunda illərdir kanalizasiya sularının yolun hərəkət hissəsinə axması problemi davam edir. 

Avtosfer.az xəbər verir ki, sakinlərin sözlərinə görə, məsələ uzun müddətdir həllini tapmır və xüsusilə yağışlı havalarda vəziyyət daha da ağırlaşır.
Bildirilib ki, kanalizasiya suları açıq şəkildə asfalt örtüyünün üzərinə axır, nəticədə yol örtüyü zədələnir, ərazidə kəskin qoxu yaranır və sanitar vəziyyət pisləşir. Sürücülər qeyd edirlər ki, daimi nəmişlik və çirkli su asfaltın tez sıradan çıxmasına səbəb olur, çuxurlar əmələ gəlir və bu da avtomobillər üçün əlavə risk yaradır.

Ərazidə yaşayan sakinlər isə bildirirlər ki, problem təkcə yol infrastrukturuna deyil, həm də onların gündəlik həyatına mənfi təsir göstərir. Yay aylarında qoxunun artması, qışda isə buzlanma riski vəziyyəti daha təhlükəli edir.

Problemin köklü həlli üçün isə kommunikasiya xətlərinin yenilənməsi və ya əsaslı təmir işlərinin aparılması vacibdir.

İri Şəhərlərin Birləşmiş Su Təchizatı Xidmətindən Avtosfer.az-ın sorğusuna cavab olaraq bildirilib ki, problem artıq aradan qaldırılıb. Xəttin fəaliyyəti bərpa edilib.

Eltac Zülfüqaroğlu