“ChatGPT” kütləvi qırğın silahı hazırlamağın yollarını öyrədir

Süni intellektdən hansısa işdə köməklə yanaşı, pis niyyətlə də istifadə edənlər tapılır. Azərbaycanda əsasən gənclərin gündəlik istifadə etdiyi “ChatGPT” platformasının hətta kütləvi qırğın silahı hazırlamağın yollarını öyrətdiyi də məlum olub.

Avtosfer.az xəbər verir ki, “The Wall Street Journal”ın əməkdaşları “ChatGPT” ilə söhbətləşərək ondan bakterioloji və bioloji silah hazırlamağın üsullarını öyrəniblər. Proqram təhlükəli virusları aerozol formaya çevirmək, yaxud vaksinədavamlı infeksiyalar hazırlamaq barədə detallı məlumat verib (xəbərdə konkret xəstəliklərin adı göstərilsə də, biz yazmırıq – müəl.). 

Bioloqlar və təhlükəsizlik üzrə ekspertlər bildirirlər ki, süni intellektin bu sahədə bir çox təlimatı “qorxunc dərəcədə dəqiqdir”. Bəzi tövsiyələr o qədər sadədir ki, biologiya fənnini yaxşı oxuyan məktəbli də belə silahı primitiv şəkildə hazırlaya bilər. 

Məsələ ictimailəşdikdən sonra “Open AI” hesabı bloklayıb, lakin ABŞ hökumətinə məlumat verməyib. Qanunvericilik proqram təminatçıları qarşısında təhlükəli yazışmalarla bağlı xüsusi xidmət orqanlarına məlumat vermək öhdəliyi qoymur.

Vüqar