Çindən sıfır karbon hədəfinə yeni addım – 600 at gücündə mühərriki hazırlanır

Çinin mühərrik istehsalçısı “Weichai Power” ağır yük nəqliyyatı üçün hazırladığı yeni nəsil hidrogen daxiliyanma mühərrikinin sınaqlarını uğurla başa vurub.

Avtosfer.az xəbər verir ki, “WP15” adlanan 14,6 litrlik mühərrik 600 at gücü hasil edir və 46,8 faiz istilik səmərəliliyi ilə seçilir. Şirkətin məlumatına görə, bu göstərici onu ağır yük avtomobilləri üçün hazırlanmış hidrogen daxiliyanma mühərrikləri arasında ən səmərəli həllərdən birinə çevirir.

Yeni mühərrik birbaşa hidrogen püskürtmə texnologiyası ilə təchiz olunub. Bu sistem hidrogen mühərriklərində rast gəlinən vaxtından əvvəl alışma və geri alovlanma kimi problemlərin qarşısını almağa kömək edir. Eyni zamanda, yüksək təmizlik dərəcəsinə malik hidrogen yanacağına ehtiyac duymaması istismar xərclərini azaltmağa imkan verir.

“WP15” mühərrikinin hissələrinin 90 faizdən çoxu mövcud dizel platformaları ilə uyğunluq təşkil edir. Bu isə mühərrikin ciddi konstruktiv dəyişikliklərə ehtiyac olmadan yük avtomobillərinə inteqrasiya edilməsini asanlaşdırır.

Şirkət yaxın vaxtlarda mühərrikin seriya istehsalına başlamağı planlaşdırır. Yeni aqreqatın uzunməsafəli yük maşınlarında, mədən texnikasında və liman avadanlıqlarında tətbiq olunaraq ağır sənayedə karbon emissiyalarının azaldılmasına töhfə verəcəyi gözlənilir.

Eltac Zülfüqaroğlu