Deputatdan parklanma xidmətlərində sığorta məsuliyyəti ilə bağlı TƏKLİF

Parklanma xidmətlərində sığorta məsuliyyətinin qanunvericilikdə dəqiq tənzimlənməsinə ehtiyac var. Avtosfer.az xəbər verir ki, bunu deputat Vasif Qafarov Milli Məclisin bu gün keçirilən iclasında çıxışı zamanı bildirib.

Deputat qeyd edib ki, hazırda parklanma xidmətləri ödənişli olmasına baxmayaraq, parklanma zamanı avtomobilə dəyən ziyanın ödənilməsi məsuliyyəti avtomobil sahibinin üzərində qalır. Bu vəziyyətin isə vətəndaşlar üçün haqlı narazılıq yaratdığını vurğulayıb.

Vasif Qafarovun sözlərinə görə, parklanma xidmətləri göstərən qurumların məsuliyyəti, xüsusilə də sığorta məsələləri qanunvericilikdə açıq və birmənalı şəkildə müəyyən olunmalıdır. Deputat hesab edir ki, bu istiqamətdə hüquqi mexanizmlərin yaradılması həm sürücülərin hüquqlarının qorunmasına, həm də xidmət keyfiyyətinin artırılmasına töhfə verə bilər.

O, bu məsələ ilə bağlı müvafiq dəyişikliklərin və təkliflərin hazırlanmasının vacibliyini də diqqətə çatdırıb.