Dostuna pul göndərdi; məbləğ yoxa çıxdı – ABB-də nə BAŞ VERİR?

Azərbaycan Beynəlxalq Bankının (ABB) müştərisi kart hesabına edilən ödənişin geri qaytarılması ilə bağlı sosial şəbəkələrdə narazılıq edib.

Avtosfer.az-a daxil olan şikayətə görə, müştəri 1 dekabr tarixində ABB İpoteka hesabına vəsait köçürüb və ödənişin uğurla həyata keçirildiyi bildirilib. Lakin iki gün sonra müştəriyə ödənişin geri qaytarıldığı barədə bildiriş gəlib və həmin məbləğ hesab balansından çıxarılıb.

Müştəri 3 dekabr tarixində bankdan geri ödəniş məbləği ilə bağlı rəsmi sorğu təqdim edib. Bank sorğunun 3 iş günü ərzində cavablandırılacağını bildirib, lakin bu günə qədər müştəriyə heç bir rəsmi cavab təqdim edilməyib. Hətta müştəri qəbz təqdim olunmasını tələb etməsinə baxmayaraq, bank tərəfindən qəbz verilməyib.
Şikayətçi qeyd edir ki, ABB-nin çağrı mərkəzi ilə əlaqə saxladıqda əməkdaşlar hər dəfə ödənişin həmin gün geri qaytarıldığını bildirsələr də, əslində məbləğ hələ də müştərinin hesabına daxil olmayıb. Hər gün eyni açıqlama verilir, lakin nəticə yoxdur.

Müştəri narazılığını bildirərək xahiş edir ki, banka aidiyyəti qurumlar bu məsələ ilə ciddi məşğul olsun. Hazırda onun geri qaytarılmamış ödənişi üçün müraciət “icra edildi” statusunda göstərilir, lakin bankın əməkdaşlarının verdiyi açıqlamalar bir-birini təsdiqləmir və vəziyyət müştəri üçün aydın deyil.

Şikayətçinin sözlərinə görə, belə halların davam etməsi müştəri etimadına zərər verir və rəqəmsal bankçılıq xidmətinə inamı sarsıdır.

Eltac Zülfüqaroğlu