DYP-dən Dilarə Kazımovanın klipi ilə bağlı açıqlama - "Evakuator üstündə çəkilib, amma..."

Müğənni Dilarə Kazımova klip çəkilişi zamanı yol hərəkəti qaydalarını kobud şəkildə pozub. 
Avtosfer.az xəbər verir ki, klip çəkilişi zamanı müğənni sükan arxasında təhlükəsizlik kəmərindən istifadə etmir, əllərini sükandan çəkərək ayağa qalxır və başını avtomobilin lyukundan çıxarır. Onunla birlikdə avtomobildə olan sərnişin qadınlar da tez-tez yer dəyişərək, sükana əyləşib qaydalara zidd hərəkətlər ediblər. Bu görüntülər sosial şəbəkələrdə ciddi tənqidlərə səbəb olub.

Məsələ ilə bağlı Baş Dövlət Yol Polisi İdarəsindən Avtosfer.az-a bildirilib ki, görüntülərdə nəqliyyat vasitəsinin hərəkətdə olmadığı və evakuator üzərində olduğu görünür.

"Lakin bu halda belə, avtomobil üzərində yol hərəkəti qaydalarına zidd və təhlükəli hərəkətlərin reklam xarakterli çəkilişlərdə nümayiş etdirilməsi düzgün deyil və ictimaiyyətə, xüsusilə də gənclərə, yanlış mesaj verir. Baş Dövlət Yol Polisi İdarəsi hər kəsi bu kimi davranışlardan çəkinməyə və yol hərəkəti qaydalarının pozulmasını təbliğ edən təqdimatlardan uzaq durmağa çağırır.

Fidan