Elektrikli avtomobillər 4 dəqiqəyə şarj olunur: Ən sürətli modellər AÇIQLANDI

Elektrikli avtomobillərdə batareyanın doldurulması üçün saatlarla gözləmək dövrü yeni nəsil batareya texnologiyaları ilə dəyişir. Ən sürətli şarj olan modellər arasında yer alan avtomobillərdən biri batareyasını cəmi 4 dəqiqə 22 saniyəyə 70 faizə qədər doldura bilir.

Avtosfer.az xəbər verir ki, yeni nəsil batareya arxitekturası və yüksək güclü şarj infrastrukturu elektrikli avtomobillərin enerji doldurma müddətini əhəmiyyətli dərəcədə azaldıb. Əvvəllər batareyanı 10 faizdən 80 faizə qədər doldurmaq üçün 40 dəqiqəyə qədər vaxt tələb olunduğu halda, bəzi yeni modellərdə bu müddət bir neçə dəqiqəyə enib.

Elektrikli avtomobillərin geniş yayılmasına mane olan əsas amillərdən biri enerji doldurma müddətidir. Yeni batareya texnologiyaları və yüksək güclü şarj sistemləri bu problemi aradan qaldırmağa yönəlib.

Məlumata görə, “Lynk & Co 10 EV” modelində istifadə olunan “Golden Brick” batareya texnologiyası yüksək cərəyanın istilik yükünü nəzarətdə saxlamaqla ötürülməsinə imkan verir. Nəticədə avtomobilin batareyası 10 faizdən 70 faizə qədər cəmi 4 dəqiqə 22 saniyəyə doldurulur.

Bu sürətin əldə olunmasında 800 volt və daha yüksək gərginlikli elektrik arxitekturası da mühüm rol oynayır. Bəzi sistemlərdə gərginlik 897 volta qədər yüksəlir. 350–525 kVt gücündə sabit cərəyanla (DC) işləyən sürətli şarj stansiyaları isə uyğun avtomobillərin batareyalarının daha qısa müddətdə doldurulmasına şərait yaradır.

Siyahıda birinci yerdə “Lynk & Co 10 EV” qərarlaşıb. Model batareyanı 10 faizdən 70 faizə qədər 4 dəqiqə 22 saniyəyə doldurmaq imkanına malikdir.

İkinci sırada yer alan “DENZA Z9GT EV” modeli isə “FLASH Charging” sistemi ilə batareyanın doluluq səviyyəsini 10 faizdən 97 faizə qədər 9 dəqiqəyə çatdırır.

“XPeng” və “Xiaomi” markalarının bəzi modelləri də yüksək şarj sürəti ilə seçilir. Məsələn, “XPeng G9” və “Xiaomi SU7 Max” modellərində batareyanın 10 faizdən 80 faizə qədər doldurulması təxminən 12 dəqiqə çəkir.

Avropalı və Cənubi Koreyalı istehsalçıların modelləri də bu sahədə rəqabət aparır. “Porsche Taycan”, “Hyundai IONIQ 6” və “Kia EV6” kimi avtomobillərdə uyğun yüksək güclü şarj stansiyalarından istifadə etməklə batareyanı 10 faizdən 80 faizə qədər təxminən 18 dəqiqəyə doldurmaq mümkündür.

Təqdim olunan siyahıya əsasən, batareyaların doldurulma müddəti və şarj göstəriciləri belədir:

“Lynk & Co 10 EV” – 4 dəqiqə 22 saniyə (10–70%, “Golden Brick” batareyası).

“DENZA Z9GT EV” – 9 dəqiqə (10–97%, “FLASH Charging” sistemi)

“XPeng G9” (yeni nəsil) – 12 dəqiqə (10–80%, 800 V, 525 kVt DC şarj).

“Xiaomi SU7 Max” (2026) – 12 dəqiqə (10–80%, 897 V, 5.2C şarj göstəricisi).

“XPeng G9L” (BEV versiyası) – 12 dəqiqə (10–80%, 800 V, 5C şarj göstəricisi).

“Zeekr 7GT” (75 kVt·saat) – 13 dəqiqə (10–80%, 800 V, 390 kVt gücündə stansiya).

“Volvo EX60 P10 AWD” – 16 dəqiqə (10–80%, 370 kVt).

“MG IM5” – 17 dəqiqə (10–80%, 396 kVt).

“smart #5” (100 kVt·saat) – 18 dəqiqə (10–80%, 400 kVt).

“Hyundai IONIQ 6” – təxminən 18 dəqiqə (10–80%, 350 kVt gücündə stansiya).

“Kia EV6” (63 kVt·saat) – 18 dəqiqə (10–80%, 195 kVt).

“Porsche Taycan” – 18 dəqiqə (10–80%, 320 kVt).

Qeyd edək ki, göstərilən şarj müddətləri avtomobilin batareya versiyasından, temperaturdan, ilkin doluluq səviyyəsindən və istifadə olunan şarj stansiyasının gücündən asılı olaraq dəyişə bilər. Müxtəlif modellər üzrə faiz aralıqları eyni olmadığından, siyahıdakı göstəriciləri birbaşa müqayisə edərkən bunu da nəzərə almaq lazımdır.

Eltac Zülfüqaroğlu