“Əxlaqsızlığa” görə kəsdikləri interneti aeroporta görə açdılar

Əfqanıstanda bir neçə gün əvvəl kəsilmiş internet bərpa olunub. 

Avtosfer.az xəbər verir ki, əvvəlcə Qəndahar əyalətində, ardınca isə bütün ölkədə dini liderin tələbi əsasında İnternet kəsilmişdi. NetBlocks təşkilatı sentyabrın 29-u axşamdan etibarən ölkədə İnternetin bütünlüklə dayandığını elan etmişdi.

Bundan bir neçə gün əvvəl isə Qəndaharın tanınmış mollalarından biri internetin “əxlaqsızlıqla mübarizə” məqsədi ilə söndürüldüyünü açıqlamışdı.

Lakin bu arxaik davranışın tərəfdarları müasir texnologiya qarşısında geri  çəkilməli olublar. İnternet kəsildiyi üçün banklar və aeroportların işində ciddi ləngimələr yaranıb. Dövlət qurumlarının xidmətində fasilələr baş verib.

Beynəlxalq yükdaşımalarda ciddi ləngimələr qeydə alınıb. Hava yolu ilə humanitar yardımların gəlməsi dayanıb. Ölkə dünyadan təcrid olunub.
Rəsmi Taliban hökuməti məsələni şərh etmir. “Əxlaqsızlıqla mübarizə” aparanlar da İnternetin bərpasına etiraz səslərini çıxarmırlar.

Vüqar Yaşaroğlu