Gürcüstandakı “insan mərkəzli küçə” nümunəsi Bakıya gətirilə bilər? - FOTO

Gürcüstanın paytaxtı Tbilisidə şəhərin əsas küçələrindən biri olan Rustaveli prospektinin əsaslı yenidən qurulmasına başlanılır. İyulun 23-dən start veriləcək layihənin məqsədi prospekti avtomobilyönümlü magistraldan bütün hərəkət iştirakçıları üçün təhlükəsiz, rahat və əlçatan ictimai məkana çevirməkdir.

Avtosfer.az xəbər verir ki, bu barədə nəqliyyat eksperti Rauf Ağamirzəyev paylaşım edib.

Ekspertin sözlərinə görə, Tbilisi Nəqliyyat və Şəhərsalma Agentliyinin rəhbəri Nino Baqaşvilinin də qeyd etdiyi kimi, hazırkı Rustaveli prospekti əsasən avtomobillərin hərəkətinə xidmət edir. Bu isə piyadaların rahatlığını məhdudlaşdırır. Hazırda insanlar küçəni əsasən yeraltı keçidlər vasitəsilə keçməyə məcbur olur ki, bu da yaşlılar, əlilliyi olan şəxslər, uşaq arabasından istifadə edən valideynlər və digər piyadalar üçün ciddi çətinlik yaradır.

Rauf Ağamirzəyev bildirib ki, yenidənqurma layihəsi çərçivəsində piyadalar üçün maneəsiz və təhlükəsiz hərəkət imkanları yaradılacaq, əlçatanlıq standartları tətbiq ediləcək, velosiped infrastrukturu inkişaf etdiriləcək, ictimai nəqliyyatın hərəkəti və dayanacaqları daha səmərəli təşkil olunacaq. Eyni zamanda, küçə məkanı avtomobillərlə digər hərəkət iştirakçıları arasında daha balanslı şəkildə bölüşdürüləcək.

Ekspert qeyd edib ki, layihə təkcə Rustaveli prospektini deyil, Aleksandr Çavçavadze, Qriboedov və ətraf küçələri də əhatə edəcək. Bununla Tbilisinin mərkəzində müasir şəhərsalma prinsiplərinə uyğun yeni şəhər məkanı formalaşdırılacaq.

Dünyada şəhərsalma siyasəti artıq avtomobillərin üstünlük təşkil etdiyi yanaşmadan uzaqlaşaraq insan mərkəzli küçə konsepsiyasına keçir. Bu modeldə küçələr yalnız nəqliyyat dəhlizi deyil, insanların rahat hərəkət etdiyi, vaxt keçirdiyi və təhlükəsiz istifadə etdiyi ictimai məkan kimi nəzərdə tutulur.

Ekspert vurğulayıb ki, Rustaveli prospektinin yenidən qurulması region üçün mühüm nümunələrdən biri olacaq və bu təcrübə gələcəkdə Bakıda da şəhər küçələrinin daha əlçatan, təhlükəsiz və komfortlu şəkildə yenidən təşkil edilməsi baxımından maraqlı model kimi qiymətləndirilə bilər.

Eltac Zülfüqaroğlu