“Hökumət Evi” tərəfdə restoran səkini zəbt etmişdi; İCRA YIĞIŞDIRDI - VİDEO - FOTO

Baki şəhər Ticarət və Xidmət Departamentindən Avtosfer.az-ın sorğusuna cavab olaraq bildirildi ki, sözügedən iaşə obyektinə departament tərəfindən heç bir rəsmi icazə verilməyib. Sahibkara xəbərdarlıq edilərək sözügedən masalar səkidən yığışdırılmışdır.

***

13:30

***

Paytaxtın mərkəzində, Fikrət Əmirov parkının yaxınlığında yerləşən “VINTIQUE” restoranı piyadaların təhlükəsiz hərəkətinə ciddi maneə yaradıb. 

Avtosfer.az xəbər verir ki, restoran rəhbərliyi piyada səkisinin üzərinə masa və stullar yerləşdirərək onu iaşə obyektinin açıq hava hissəsinə çevirib.

Nəticədə ərazidə gediş-gəliş edən vətəndaşlar, xüsusilə yaşlılar və uşaqlı valideynlər, səkidən istifadə edə bilməyərək məcburən avtomobillərin hərəkət zolağına çıxırlar. Bu isə həm piyadalar, həm də sürücülər üçün ciddi təhlükə yaradır.

Ərazidə yaşayan sakinlər bildirirlər ki, məsələ ilə bağlı dəfələrlə şikayət edilsə də, hələlik heç bir tədbir görülməyib. Onların sözlərinə görə, ictimai iaşə obyektləri öz maraqları naminə ictimai təhlükəsizliyi arxa plana atıblar.

Baki şəhər Ticarət və Xidmət Departamentindən Avtosfer.az-ın sorğusuna cavab olaraq bildirildi ki, sözügedən iaşə obyektinə departament tərəfindən heç bir rəsmi icazə verilməyib.

Eltac Zülfüqaroğlu