İctimai nəqliyyatda problemlə qarşılaşanlara VACİB tövsiyə – Bu tətbiqdən istifadə edin

Nəqliyyat eksperti Rauf Ağamirzəyev vətəndaşları AYNA MaaS tətbiqindəki rəy və təklif imkanlarından daha fəal istifadə etməyə çağırıb.

Avtosfer.az xəbər verir ki, ekspert bildirib ki, tətbiqin "Təklif və iradlar" bölməsi vasitəsilə istifadəçilər müxtəlif mövzular üzrə öz rəy və iradlarını rahat şəkildə çatdıra bilirlər.

Rauf Ağamirzəyev qeyd edib ki, o da bir neçə gün əvvəl sürücülərdən biri ilə bağlı yaranmış problemi tətbiq üzərindən bildirib. Onun sözlərinə görə, müraciət operativ şəkildə daşıyıcı şirkətə yönləndirilib, daha sonra onunla əlaqə saxlanılıb və görülən tədbirlər barədə tətbiq vasitəsilə rəsmi bildiriş təqdim olunub.

Ekspert vurğulayıb ki, bu cür əks əlaqə mexanizmi xidmətlərin keyfiyyətinin artırılmasında mühüm rol oynayır. İstənilən xidmətin ən obyektiv qiymətini məhz istifadəçilər verir. Çünki gündəlik istifadə zamanı ortaya çıxan çatışmazlıqlar, boşluqlar və təkmilləşdirilməli məqamlar məhz istifadəçi rəyləri sayəsində müəyyən edilir.

Rauf Ağamirzəyev hesab edir ki, hər bir rəy və təklif gələcəkdə daha keyfiyyətli və səmərəli xidmətlərin formalaşdırılmasına mühüm töhfə verir.

Eltac Züflüqaroğlu