Kartdan karta ödənişlərlə bağlı limitlər vətəndaşlara necə təsir edir? – SORĞU - VİDEO

Artıq 1 aydan çoxdur ki, Azərbaycanda kartdan karta vəsait göndərilməsi ilə bağlı banklar tərəfindən müştərilərə müəyyən limitlər tətbiq edilib. Belə ki, kartlara mədaxil və kartdan karta köçürmələrdə bir gün ərzində maksimum 5 əməliyyat aparmaq mümkündür. Yəni kart sahibi hər gün öz kartı ilə 5 dəfə köçürmə edib, eyni qaydada 5 dəfə ödəniş ala bilər. Kartla gündəlik əməliyyatların sayına limit qoyulsa da, gündəlik əməliyyatlar üzrə limit yoxdur. Əvəzində kartdan karta köçürmələrin ümumi məbləği üzrə aylıq 20 000 manat limit müəyyən edilib.

Bank müştərisinin öz kartları arasında həyata keçirilən əməliyyatlar bu məhdudiyyətlərə şamil edilmir, yəni bu əməliyyatlara limit qoyulmayıb.

Vətəndaşlar isə tətbiq edilən limitlərin onların gündəlik fəaliyyətinə təsir etdiyini düşünür. Mövzu ilə bağlı Avtosfer.az-ın paytaxtda təşkil etdiyi sorğuda sakinlərin bir qismi limitlərin hələki hansısa mənfi təsirini görmədiyini deyib. Digər bir qism isə limitlərin müxtəlif sektorlarda, iaşə müəssisələrində, taksi sifarişində ödənişlərlə bağlı onlara çətinlik yaratdığını qeyd edib.

Məsələ ilə əlaqədar iqtisadçı ekspert Xalid Kərimli Avtosfer.az-a müsahibəsində bildirib ki, kartdan karta əməliyyat adi bildiyimiz nağd əməliyyatlardandır. Yəni, kartdan karta əməliyyatla cibindən pul çıxarıb verməyin hansısa fərqi yoxdur.

“Mən bu limitin tətbiq edilməsinə çox müsbət yanaşıram. Yəni, adamlar sahibkarlıq fəaliyyəti ilə məşğuldursa, vergi verməlidirlər. Kartdan karta əməliyyatlar da müəyyən komfort yaradır. Dövlət isə vergidən yayınmaq istəyənlər üçün əlavə komfort yaratmaq istəmir və doğru da eləyir. Vergidən yayınanlar üçün əksinə, şərtlər pisləşməlidir, çətinləşməlidir ki, vergidən yayınmağa can atılmasın.

Kartdan karta əməliyyat vergidən yayınmaq üçün kanaldır. Biz cəmiyyət olaraq əgər hesab ediriksə ki, taksi sürücüləri vergi verməməlidir, cəmiyyətin qanunvericilik təşəbbüsünü deputatlar həyata keçirir. Deputatlar toplaşmalıdır, Vergi Məcələsində düzəliş etməlidirlər ki, taksi sürücüləri vergi verməsin. Vətəndaşa kartdan karta əməliyyatlarına tətbiq edilən limitlər heç bir təsir etmir”.

Səfər