"Köçəryan və Sərkisyan Azərbaycana təhvil verilə bilər?" – Politoloqdan diqqətçəkən şərhlər

Ermənistanda sabiq prezident Robert Köçəryan və digər keçmiş yüksəkvəzifəli şəxslərə qarşı yeni və genişmiqyaslı cinayət işi başladılıb. O, öncə Milli Təhlükəsizlik Xidmətinə, daha sonra Korrupsiyaya Qarşı Mübarizə Komitəsinə aparılıb, habelə özünün və ailə üzvlərinin əmlaklarında axtarışlar aparılıb.

Köçəryana qarşı vəzifə səlahiyyətlərindən sui-istifadə, külli miqdarda rüşvətalma və çirkli pulların yuyulması maddələri üzrə ittihamlar irəli sürülüb. İstintaqın versiyasına görə, o, 1998–2008-ci illərdə prezident olduğu müddətdə dövlət mülkiyyətindən çıxarılan qiymətli əmlakları bazar dəyərindən xeyli aşağı qiymətə əldə edib.

Cinayət təqibi yalnız Köçəryanla məhdudlaşmır. Əməliyyat çərçivəsində daha 9 nəfər, o cümlədən onun oğlu Sedrak Köçəryan, eks-prezident Serj Sərkisyan, keçmiş baş nazir Andranik Marqaryan və İrəvanın sabiq meri Qagik Beqlaryan məsuliyyətə cəlb olunub.

"Paşinyan addım-addım hazırlaşdı"

Məsələni şərh edən politoloq Turan Rzayev bildirib ki, Nikol Paşinyanın keçmiş klan rəhbərlərini həbs etdirəcəyi gözlənilən idi:

"Paşinyan prosesi tələsdirmədi. Öncə parlament seçkilərində qələbə qazanaraq mövqeyini möhkəmləndirdi, yetərli çoxluğu sağladı və rəqiblərinin həbsi üçün hüquqi zəminin tam yetişməsini gözlədi. İndi isə hərəkətə keçilib. Vəziyyətdən asılı olaraq, o, Köçəryan və Sərkisyanın yenidən siyasi səhnəyə qayıtmasının qarşısını alacaq. Proses daha da genişlənə və onların əsas tərəfdarları da həbs edilə bilər."

Köçəryan və Sərkisyan Azərbaycana təhvil verilə bilər?

Baş verənlərin daxili siyasi çəkişmə olduğunu vurğulayan politoloq, eks-prezidentlərin Azərbaycana ekstradisiya olunma ehtimalına da toxunub:

• Azərbaycanın mövqeyi: Bu həbslər Bakının tələbi ilə deyil, İrəvanın daxili planı üzrə baş tutur və Azərbaycan buna Ermənistanın daxili işi kimi baxır.

• 44 günlük müharibə xatirəsi: Müharibə dövründə Qarabağa gələn Köçəryan və Sərkisyan Azərbaycan tərəfinin onları həbs edəcəyindən xəbər tutaraq Rusiya kəşfiyyatının köməyi ilə Ermənistana qaçmışdılar.

• Hüquqi baza: Hazırda iki ölkə arasında ədliyyə sahəsində hər hansı razılaşma və təmas yoxdur. Bu səbəbdən Paşinyan istəsə belə, onları indiki məqamda Azərbaycana verə bilməz.

Turan Rzayev əlavə edib ki, hazırda bu mümkün olmasa da, gələcəkdə beynəlxalq və ya ortaq məhkəmə mexanizmləri vasitəsilə Robert Köçəryan və Serj Sərkisyanın azərbaycanlılara qarşı törətdikləri hərbi və insanlıq əleyhinə cinayətlərə görə mühakimə olunması istisna edilmir./news365.az