Köhnə model iPhone işlədənlər üçün VACİB XƏBƏR

"Apple" şirkəti köhnə model "iPhone" istifadəçilərinə təcili yeniləmə etmələri ilə bağlı çağırış edib.

Avtosfer.az Baku.ws-ə istinadən xəbər verir ki, şirkət smartfonları üçün iOS 18.7.7 versiyasını təqdim edib və istifadəçilərə bu yeniləməni dərhal quraşdırmağı tövsiyə edib.

Bildirilir ki, "Apple" adətən istifadəçiləri yeni cihazlara və ən son iOS versiyalarına keçməyə təşviq edir. Lakin bu dəfə şirkət istisna edərək köhnə modellərə də aktiv dəstək göstərməyə başlayıb.

Qeyd olunur ki, iOS 18.7.7 yeniləməsi texniki baxımdan iOS 26 versiyasını dəstəkləməyən "iPhone" modelləri üçün nəzərdə tutulub. Təcili yeniləmənin əsas səbəblərindən biri isə "Coruna" adlı zərərli proqram təminatıdır.

Mütəxəssislərin sözlərinə görə, bu virus iOS sistemindəki bir sıra boşluqlardan istifadə edərək hakerlərə cihaz üzərində nəzarət imkanı yaradır. Ən narahatedici məqam isə ondan ibarətdir ki, istifadəçinin əlavə əməliyyat etməsinə ehtiyac olmadan - sadəcə zərərli səhifəni açmaq kifayət edir.

Ekspertlər bildirir ki, iOS 18.7.7 istifadəçiləri bu hücumlardan qorumaq üçün yetərli səviyyədə təhlükəsizlik təmin edir. Bununla yanaşı, imkan olduqda daha yüksək qoruma səviyyəsinə malik iOS 26 versiyasına keçid də tövsiyə olunur.

Qeyd edək ki, mart ayının sonunda "Apple" köhnə iOS versiyalarından istifadə edən "iPhone" sahiblərinə bildirişlər göndərməyə başlayıb. Buna səbəb şirkətin öz cihazlarına qarşı həyata keçirilən kiberhücumları qeydə alması olub.