“Koroğlu” metrosu yaxınlığında yol örtüyü niyə yenilənmir? – AÇIQLAMA

“Koroğlu” metrosu yaxınlığında yol örtüyünün uzun müddətdir lazımi vəziyyətə gətirilməməsi sürücülərin narazılığına səbəb olub.

Avtosfer.az xəbər verir ki, mövcud vəziyyətin xüsusilə günün müəyyən saatlarında nəqliyyatın hərəkətinə çətinlik yaratdır.

Sürücülərin sözlərinə görə, həftəiçi günlərdə yolda avtomobillərin hərəkəti daha da çətinləşir. Həftəsonu isə qeyri-iş günü olmasına baxmayaraq ərazidə nəqliyyat sıxlığı müşahidə olunur. Yol örtüyünün vəziyyəti sürücüləri daha ehtiyatlı hərəkət etməyə məcbur edir. Yolda yaranan çətinliklər səbəbindən avtomobillərin hərəkət sürəti azalır, bəzi hallarda nəqliyyat vasitələrinin alt hissəsi yolun örtüyünə dəyir. Bu isə həm avtomobillərin texniki vəziyyəti ilə bağlı risklər yaradır, həm də sürücülərin qısa məsafələrə belə daha uzun müddətdə çatmasına səbəb olur.

Məsələ ilə bağlı AAYDA-dan Avtosfer.az-a verilən məlumatda bildirilib ki, ərazidə yol örtüyünün mövcud vəziyyəti qurumun diqqətindədir:

“Qeyd olunan ərazidə yol örtüyünün mövcud vəziyyətinin qiymətləndirilməsi və hərəkətin təhlükəsizliyinin təmin olunması məqsədilə yaxın müddətdə müvafiq tədbirlərin görülməsi nəzərdə tutulur. Əraziyə baxış keçirilərək zəruri işlərin müəyyənləşdirilməsi və müvafiq qaydada həyata keçirilməsi təmin ediləcək”.

Züleyxa Allehverdiyeva