Lökbatanda sel biabırçılığı - Yağış bütün nöqsanları üzə çıxardı

Bu başlıq sizə mübaliğə kimi gəlməsin. Bu axşam Abşeron ticarət mərkəzinin qarşısındakı yolda gördüyüm vəziyyət məni xəyalən də olsa 10 il əvvəl səfər etdiyim Venesiyaya qaytardı.

Meyvəli bazarından təxminən 1 kilometr sonra, Abşeron  ticarət mərkəzinin qarşısındakı (Sədərək ticarət mərkəzinin arxası) yol sözün həqiq mənasında gölə dönmüşdü.

Buna görə də polis əməkdaşları yolu bağlayaraq avtomobilləri Abşeron  ticarət mərkəzinin ərazisindəki yola yönləndirirdi. Bu hissə hündürləşdirildiyi üçün su hələ gəlib ora çatmırdı. Müqayisə üçün deyim ki, su hərəkət edən ZİL-in təkərlərini örtmüşdü.

Yəni, bura minik avtomobili girsə faciə qaçınılmaz olacaqdı.

Bu yoldan hər gün istifadə edən sərnişin kimi bir daha təhlükənin səviyyəsinə əmin oldum. Belə bir böyük ərazidə yağış kanalizasiyası yoxdur. Halbuki, bu yolla dəniz arasında məsafə heç 5 kilometr deyil. Yağış kanalizasiyası olarsa belə göl yaranmaz. 

Hörmətli oxucu sual verə bilər ki, bəs nə üçün foto çəkməmisən?

Sadəcə olaraq ərazidə işıqlanma yox idi, mindiyim avtobusun şüşələri Xocəsən yolundakı gölməçələrdən sıçrayan su nəticəsində palçıqla örtülmüşdü. Belə bir şəraitdə peşəkar kamera belə, keyfiyyətli təsvir verə bilməzdi. 

Yolun işıqlandırılmaması da risk faktorudur. Əminliklə deyə bilərik ki, yol polisi ərazidə xidmət aparmasa, avtomobillər təhlükəsiz əraziyə yönləndirilməsə, ötən il

Bağırov körpüsündə baş verən faciə təkrarlana bilər. 
Yeri gəlmişkən, dəfələrlə çalaya düşən avtobusun asqı sistemi də şübhəsiz zərər görüb.

Vüqar Yaşaroğlu